Tungi tinchlikni buzganlarga jarimalar oshiriladi
O‘zbekistonda tungi osoyishtalikni buzgan fuqarolar va mansabdor shaxslarga nisbatan jarimalar sezilarli darajada oshirilishi kutilmoqda. Bu haqida Zamin.uz xabar berdi.
Qonunchilik palatasi “Tungi tinchlikni buzganlik uchun javobgarlikni kuchaytirish” bo‘yicha qonun loyihasini birinchi o‘qishda ma’qulladi. Ushbu hujjatga ko‘ra, yaqin kelajakda respublika hududida dam olish kunlari va ish kunlari uchun alohida “tinchlik soatlari” joriy etiladi.
Dam olish kunlari, ya’ni shanba va yakshanba kunlari tungi osoyishtalik 22:00 dan 09:00 gacha, ish kunlarida esa 23:00 dan 06:00 gacha saqlanadi. Bu vaqt oralig‘ida baland ovozda musiqa tinglash, uy yoki bino ta’mirlash, shuningdek boshqa shovqinli ishlarni bajarish taqiqlanadi.
Qonun kuchga kirgach, ushbu qoidalarga rioya qilmagan shaxslarga moliyaviy jazolar qo‘llaniladi. Loyihaga ko‘ra, fuqarolarga 5 baravar bazaviy hisoblash miqdorida jarima solinadi, bu hozirgi qiymat bilan taxminan 2 million so‘mni tashkil etadi.
Mansabdor shaxslar uchun jarima 15 baravar BHMga yetib, 6 million so‘mdan oshishi mumkin. Hozirgi qonunchilikka muvofiq, tungi tinchlikni buzganlik uchun jarima miqdori taxminan 113 ming so‘m bo‘lib, yangi qonun kuchga kirgach, bu miqdor qariyb 18 barobar oshadi.
Mutaxassislar fikricha, bu o‘zgarishlar fuqarolarning shaxsiy hayotiga hurmatni oshirish, dam olish huquqlarini himoya qilish va jamoat tartibini mustahkamlashga xizmat qiladi. Qonun hozirda keyingi o‘qishlar jarayonida ko‘rib chiqilmoqda.
Qabul qilingach, tungi tinchlikni buzish faqat axloqiy emas, balki jiddiy huquqbuzarlik sifatida baholanadi (manba: zamin.uz).
