O‘zbekiston va Fransiya diplomatik vizasiz rejim joriy etdi
O‘zbekiston Respublikasi Prezidenti tomonidan 2025-yil 30-iyulda PQ–238-sonli “Xalqaro shartnomani tasdiqlash to‘g‘risida”gi qaror imzolandi. Bu haqida Zamin.uz xabar berdi.
Ushbu qaror bilan ikki davlat o‘rtasida muhim ahamiyatga ega bo‘lgan bir qator xalqaro hujjatlar rasmiy tasdiqdan o‘tdi. Xususan, 2025-yil 12-mart kuni Fransiyaning Parij shahrida O‘zbekiston va Fransiya hukumatlari o‘rtasida imzolangan shartnomalar kuchga kirdi.
Ushbu shartnomalardan biri diplomatik pasport egalari uchun vizasiz rejimni belgilaydi. Bu esa ikki mamlakat diplomatlariga qisqa muddatli safarlar davomida vizasiz kirish huquqini beradi.
Bundan tashqari, rasmiy vakolatxonalar xodimlarining oila a’zolari uchun mehnat faoliyatiga ruxsat berilgan. Ya’ni, diplomatik missiya a’zolarining oila a’zolari Fransiya yoki O‘zbekistonda haq to‘lanadigan ish bilan shug‘ullanish imkoniga ega bo‘ladi.
Mazkur shartnomalarni amaliyotga joriy etish uchun O‘zbekiston Respublikasi Tashqi ishlar vazirligi mas’ul organ sifatida belgilangan. Shuningdek, Vazirlar Mahkamasi hamda boshqa tegishli vazirlik va idoralarga ushbu shartnomalarning ijrosini ta’minlash va ularning amaldagi qo‘llanilishini nazorat qilish vazifasi yuklatildi.
Ushbu kelishuv ikki davlat o‘rtasidagi siyosiy va diplomatik aloqalarni yanada mustahkamlashda muhim ahamiyatga ega hisoblanadi (Manba: zamin.uz).
