TBC Bank guruhi OLX Uzbekistan onlayn e’lonlar servisining nazorat paketini sotib olish bo‘yicha kelishuvga erishdi. Bu haqida Zamin.uz xabar berdi.
Bu haqda Kursiv nashri xabar berdi. Ushbu xarid uchun TBC Bank xalqaro investorlar qo‘llab-quvvatlagan Titan Investments xoldingi bilan qo‘shma korxona tashkil etdi.
Aksiyalar OLX Group’dan sotib olinadi, OLX Group esa Prosus kompaniyasiga qarashli. Kelishuvga ko‘ra, TBC Bank 50 foizdan ortiq, ya’ni 50% plus 1 dona aksiya egasiga aylanadi.
Qolgan aksiyalar esa Titan Investments xoldingiga tegishli bo‘ladi. Hozirda shartnomani rasmiylashtirish uchun tegishli regulatorlardan rozilik olinmoqda.
TBC Bank ma’lum qilishicha, Prosus bilan tuzilgan ushbu bitim bankka OLX Uzbekistan orqali yangi mijozlar segmentiga chiqish imkonini beradi. OLX Uzbekistan sayti mamlakatdagi eng ko‘p tashrif buyuriladigan oltinchi sayt hisoblanadi.
Hozirda OLX Uzbekistan platformasida oyiga 5,4 million faol foydalanuvchi va 2,2 million faol e’lon mavjud. OLX brendi O‘zbekistonda o‘z nomi bilan faoliyatini davom ettiradi.
TBC Bank servisni o‘zining ekotizimiga integratsiya qilishni rejalashtirmoqda. Bu esa bankning raqamli xizmatlar doirasini kengaytirish va mijozlarga yanada qulay xizmatlar taqdim etishga imkon yaratadi.
Manba: kursiv.uz
