O‘zbekistonda sudyalar tayyorlash tizimi yangilanadi
O‘zbekistonda sud-huquq sohasini tubdan takomillashtirish va sudyalikka nomzodlarni tayyorlash tizimini yangi bosqichga olib chiqish maqsadida muhim islohotlar joriy etilmoqda. Bu haqida Zamin.uz xabar berdi.
Prezidentning 21 avgustdagi farmoniga muvofiq, Sudyalar oliy kengashi huzuridagi Sudyalar oliy maktabi negizida “O‘zbekiston Respublikasi Odil sudlov akademiyasi” tashkil etiladi. 2025 yil 1 oktyabrdan boshlab sudyalik lavozimlariga da’vogarlar ushbu akademiyada maxsus olti oylik kasbiy qayta tayyorlash kurslarida davlat granti asosida ta’lim oladilar.
Kurs davomida tinglovchilarning amaldagi ish joyi saqlanadi va ularga sudya yordamchisi oylik maoshiga teng miqdorda stipendiya to‘lanadi. Kursga qabul tanlov asosida amalga oshiriladi.
Nomzodlar psixologiya fanidan test, chet tili bo‘yicha sinov, sud ixtisosligi yo‘nalishida test, yozma imtihon hamda shaxsiy suhbatdan o‘tadilar. Yakuniy attestatsiyani muvaffaqiyatli topshirgan bitiruvchilar bo‘sh sudyalik lavozimlariga o‘tkaziladigan tanlovlarda ishtirok etish huquqiga ega bo‘ladilar.
O‘qish dasturini o‘zlashtira olmagan yoki lavozimni rad etgan tinglovchilar o‘qish jarayonida olgan stipendiyasini to‘liq qaytarishlari shart. Shuningdek, sudya va sud apparati xodimlari uchun majburiy malaka oshirish tizimi joriy etiladi.
5 yil muddatga tayinlangan sudyalar har ikki yilda kamida ikki haftalik kurslardan o‘tadilar. 10 yil muddatga tayinlanganlar har uch yilda ikki haftadan kam bo‘lmagan o‘quv dasturini bajaradilar.
Oliy sud sudyalari, sud raislari va o‘rinbosarlari esa har uch yilda bir haftalik kursda ishtirok etadilar. Samaradorligi past bo‘lgan sudyalar navbatdan tashqari ikki haftalik kursga jalb qilinadi.
Sud apparati xodimlari har ikki yilda bir haftalik malaka oshirish kursini o‘tashlari lozim. Kelgusida rahbar lavozimlarga faqat qayta tayyorlash kurslarini muvaffaqiyatli tamomlagan sudyalar tayinlanishi belgilangan.
2026/2027 o‘quv yilidan boshlab akademiyada “Sud faoliyati” yo‘nalishida magistratura dasturi ham yo‘lga qo‘yiladi. Ushbu islohotlar sudyalik lavozimlariga nomzodlarni puxta tayyorlash, amaldagi sudyalarning malakasini oshirish hamda sud tizimining samaradorligini yanada kuchaytirishga xizmat qiladi.
Manba: zamin.uz
