Toshkentda ko‘zi ojizlar uchun yo‘lboshchi itlar tayyorlanmoqda
Toshkent shahrida aholining hayotini yengillashtirish va ularning harakatlanishini xavfsiz qilish maqsadida noyob loyiha amalga oshirilmoqda. Bu haqida Zamin.uz xabar berdi.
Ichki ishlar vazirligi bosh boshqarmasi matbuot xizmati ma’lumotiga ko‘ra, tajriba sifatida ko‘zi ojiz shaxslar uchun yo‘lboshchi itlar, shuningdek yolg‘iz nogironligi bo‘lgan fuqarolar uchun yordamchi itlar tayyorlanmoqda. Hozirgi kunda maxsus mashg‘ulot maydonlarida itlarni o‘qitish jarayoni davom etmoqda.
Avvalo itlar maxsus arenalarda tayyorlanib, keyinchalik shahar ko‘chalarida amaliy mashg‘ulotlar o‘tkaziladi. Yo‘lboshchi itlar ko‘zi ojiz insonlarga xavfsiz harakatlanishda, turli to‘siqlarni yengib o‘tishda va kerakli manzilga yetib borishda yordam beradi.
Yordamchi itlar esa nogironligi bo‘lgan yolg‘iz insonlarga uy ishlarida ham ko‘mak beradi. Masalan, ular oldindan belgilangan marshrut bo‘yicha yurishni, zarur dori-darmon yoki oziq-ovqatni olib kelishni, shuningdek maxsus sumkada ro‘yxatga muvofiq xarid qilishni o‘rganadilar.
Farmatsevt yoki sotuvchi buyurtmani sumkaga joylashtirgach, it uyga qaytish buyruqlarini bajaradi. Ta’lim jarayonida itlar maxsus murabbiylar bilan birga yo‘lga chiqib, yo‘lni yodlash va turli vaziyatlarga to‘g‘ri javob qaytarishni o‘rganadi.
To‘liq tayyorgarlik kursi sakkizdan o‘n oygacha davom etadi. Shu muddat ichida itlar kerakli joylarning nomlarini eslab qoladi, u yerga borib qaytishni va egasini xavfsiz yetaklashni o‘zlashtiradi.
Ushbu tashabbus mamlakatimizda birinchi marta amalga oshirilayotgani sababli, aholiga yo‘lboshchi va yordamchi itlarning ahamiyati haqida tushuntirish ishlari olib boriladi. Mutaxassislarning ta’kidlashicha, yo‘lboshchi itlar insonning ko‘zi, qo‘li yoki oyog‘i bo‘lish bilan birga, uning hayotidagi so‘zsiz do‘sti sifatida ham xizmat qiladi.
Manba: IIV Bosh boshqarmasi matbuot xizmati.
