Ichki ishlar organlarida huquqbuzarliklarni oldini olish, shuningdek, ularni tez va samarali aniqlash maqsadida uchuvchisiz uchish apparatlari, ya’ni dronlardan foydalanish boshlandi. Bu haqida Zamin.uz xabar berdi.
Bu haqda Ichki ishlar vazirligi Huquqbuzarliklar profilaktikasi xizmati boshlig‘i o‘rinbosari Rahimjon Nayimov ma’lumot berdi. Ma’lum qilinishicha, dastlab dronlardan Buxoro viloyatida foydalanish yo‘lga qo‘yilgan.
2024-yilda davlat rahbarining Buxoro viloyatiga tashrifi chog‘ida berilgan topshiriq asosida viloyat hokimligi tomonidan umumiy 150 ta zamonaviy dronlar xarid qilingan. Hozirda beshta viloyatdagi 84 ta huquqni muhofaza qilish bo‘linmalari xodimlari dronlar bilan ta’minlanmoqda.
Ichki ishlar vazirligi yaqin kelajakda yana dronlarni sotib olish masalasini ko‘rib chiqmoqda. 2026-yil oxiriga qadar barcha tuman va shahar bo‘limlari uchuvchisiz uchish apparatlari bilan to‘liq jihozlanishi rejalashtirilgan.
Dronlardan asosan kriminogen vaziyati og‘ir hududlarda, mayda bezorilik, ekologik qoidabuzarliklar hamda giyohvandlik vositalari bilan bog‘liq qonunbuzarliklarni aniqlash va oldini olishda foydalanilmoqda. Rahimjon Nayimovning ta’kidlashicha, dronlar orqali havodan nazorat olib borilib, aniqlangan holatlar bo‘yicha ichki ishlar xodimlari tezkor choralar ko‘radi.
Uchuvchisiz uchish apparatlari huquqbuzarliklarni aniqlash va ularning oldini olishda samarali natija bermoqda. Bundan tashqari, profilaktika katta inspektorlari dronlarni boshqarish va samarali uchirish bo‘yicha muntazam malaka oshirish mashg‘ulotlarida qatnashmoqda.
2024-yil aprel oyida Ichki ishlar organlari faoliyatida dronlardan foydalanish joriy etilishi rasman e’lon qilingan edi. Ushbu yangiliklar ichki ishlar tizimida nazorat va profilaktika ishlarini yanada samarali qilishga xizmat qiladi.
Manba: zamin.uz
