O‘zbekiston xalqaro turizm markaziga aylanmoqda
Ukrainaning Kyiv Diplomatic jurnalida "O‘zbekiston xalqaro turizm markaziga aylanmoqda" sarlavhali tahliliy maqola chop etildi. Bu haqida Zamin.uz xabar berdi.
Ushbu maqolada mamlakatimizdagi tashqi turizm sohasida kuzatilayotgan tezkor o‘sish va hukumat tomonidan amalga oshirilayotgan chora-tadbirlar batafsil yoritilgan. Nashrda ta’kidlanishicha, viza olish jarayonlarining soddalashtirilishi, aviaqatnovlar geografiyasining kengayishi, qo‘shni davlatlar bilan yaqin hamkorlikning mustahkamlanishi hamda turli ma’muriy to‘siqlarning bekor qilinishi pandemiyadan keyin odamlarning yangi taassurotlarga chanqoqligini oshirdi va turizm sohasining rivojlanishiga katta turtki berdi.
Jurnal ma’lumotlariga ko‘ra, 2024 yil davomida O‘zbekistonga kelgan xorijiy mehmonlar soni 5,7 milliondan oshdi. Bu ko‘rsatkich so‘nggi yillardagi eng yuqori darajadir.
Maqolada qayd etilishicha, mamlakatimizga Yevropa Ittifoqi davlatlari va Amerika Qo‘shma Shtatlaridan o‘n minglab sayyohlar tashrif buyurgan. Bu jarayon avvalo hukumatning turizm infratuzilmasini rivojlantirishga qaratilgan qat’iy siyosatining natijasidir.
Yangi mehmonxonalar qurilishi, transport tizimining yaxshilanishi hamda xalqaro miqyosdagi madaniy tadbirlar va festivallar tashkil etilishi turizm sohasining yanada jozibador bo‘lishiga xizmat qilmoqda. Shu tariqa, xalqaro ekspertlarning fikriga ko‘ra, O‘zbekiston nafaqat Markaziy Osiyoda, balki butun dunyoda e’tibor qaratilayotgan yirik turizm markaziga aylanish yo‘lida izchil qadamlar tashlamoqda.
Ushbu holat mamlakatimizning turizm salohiyatini yanada oshirishga va xalqaro maydonda o‘z o‘rnini mustahkamlashga xizmat qiladi. Manba: Kyiv Diplomatic jurnali.
