Gulbarg shaklidagi qo‘rg‘oshin idish O‘zbekistonga qaytarildi
O‘zbekiston madaniy merosi yana bir muhim tarixiy artefakt bilan boyitilmoqda. Bu haqida Zamin.uz xabar berdi.
XII-XIII asrlarga oid bo‘lib, G‘aznaviylar davriga taalluqli noyob buyum — gulbarg shaklidagi qo‘rg‘oshin idish Londondan O‘zbekistonga qaytarilmoqda. Ushbu noyob topilma uzoq yillar davomida Londondagi mashhur Orfey galereyasida saqlangan.
Endilikda bu artefakt Vatanimizga olib kelinib, Islom sivilizatsiyasi markazining eksponatlari qatorida namoyish etiladi. Idishning o‘ziga xosligi nafaqat shaklida, balki tarixiy ahamiyatida ham namoyon bo‘ladi.
Mutaxassislarning fikricha, u o‘rta asrlarda ishlab chiqarilgan bo‘lib, o‘sha davr hunarmandchilik madaniyati va san’atining yorqin namunasi hisoblanadi. Bugungi kunda O‘zbekistonda tarixiy merosni asrab-avaylash hamda xorijdagi yurtimizga tegishli san’at asarlarini qaytarish borasida keng ko‘lamli ishlar olib borilmoqda.
Xususan, so‘nggi yillarda xorijda saqlanayotgan bir qator kitoblar, qo‘lyozmalar va san’at asarlari O‘zbekistonga olib kelindi. Ushbu sa’y-harakatlar madaniy boyliklarimizni tiklash va xalqimiz tarixini yanada boyitishda muhim ahamiyatga ega.
Manba: zamin.uz
