O‘zbekiston pasporti reytingda 72-o‘rinni oldi
2025-yil 8-sentabr holatiga ko‘ra, O‘zbekiston pasporti Henley Passport Index reytingida 72-o‘rinni egalladi. Bu haqida Zamin.uz xabar berdi.
Bu ko‘rsatkich joriy yil iyul oyining oxirida qayd etilgan 74-o‘rindan yaxshilanish hisoblanadi. Henley Passport Index 199 ta pasport va 227 ta davlatni vizasiz sayohat imkoniyatlariga qarab baholaydi hamda har chorakda yangilanadi.
O‘zbekiston pasporti egalari hozirda 62 ta davlatga vizasiz kirish huquqiga ega. Reytingda O‘zbekiston bilan yaqin o‘rinlarda Mozambik (72-o‘rin) va San-Tome va Prinsipi (73-o‘rin) joylashgan.
Eng yuqori o‘rinni Singapur pasporti egallab turibdi. Singapur fuqarolari 193 ta davlatga vizasiz sayohat qilish imkoniyatiga ega.
Unga Janubiy Koreya va Yaponiya davlatlari yaqin kelmoqda. Reytingning oxirgi o‘rinlarida Iroq (96-o‘rin), Suriya (97-o‘rin) va Afg‘oniston (98-o‘rin) joylashgan.
Ma’lumot manbasi: Kursiv Media.
