Toshkent shahar hokimligi bozorlardagi savdo jarayonlarini shaffoflashtirish va mahsulot narxlarining sun’iy oshishini oldini olish maqsadida yangi texnik chora-tadbirlarni joriy etdi. Bu haqida Zamin.uz xabar berdi.
So‘nggi paytlarda ijtimoiy tarmoqlarda ayrim savdo rastalarida e’lon qilingan narxlardan farqli ravishda mahsulotlar qimmatroq sotilishi haqida shikoyatlar ko‘paydi. Shu sababli, arzonlashtirilgan mahsulotlar savdosi tashkil etilgan bozorlarida narxlarning noqonuniy oshirilishining oldi olinishi va savdo jarayonining ochiqligi ta’minlanishi zarur bo‘ldi.
Hokimlik ma’lum qilishicha, Mirobod dehqon bozori va Eski Juva (Chorsu) bozorida kuzatuv kameralari o‘rnatish ishlari to‘liq yakunlandi. Endi ushbu zamonaviy nazorat tizimi yordamida savdo sohasidagi tartibsizliklar, noqonuniy qo‘shimcha narxlar va iste’molchilarga nisbatan adolatsiz harakatlarning oldi olinadi.
Mazkur loyiha doirasida poytaxtning boshqa yirik va ahamiyatli bozorlari ham bosqichma-bosqich kuzatuv kameralari bilan ta’minlanadi. Bu chora-tadbirlar bozorlardagi savdo munosabatlarini nazorat qilish, xaridorlar uchun xavfsiz va qulay muhit yaratishga xizmat qiladi.
Manba: zamin.uz
