Shota Rustaveli ko‘chasida transport tizimi yangilanadi
Transport vazirligi Shota Rustaveli ko‘chasida olib borilayotgan keng ko‘lamli rekonstruksiya va modernizatsiya ishlarining dastlabki natijalarini e’lon qildi. Bu haqida Zamin.uz xabar berdi.
Mutaxassislarning hisob-kitoblariga ko‘ra, loyiha to‘liq yakunlangach, yo‘lovchi tashish hajmi kun davomida taxminan 300 ming kishiga yetadi va transport harakati ancha osonlashadi. Yangi tizim doirasida avtobus yo‘nalishlari soni 40 foizga ko‘payadi, kundalik reyslar soni esa 2 mingdan 2,8 ming martabagacha oshirilishi rejalashtirilgan.
Bu yo‘lovchi oqimi va yuk tashish imkoniyatini ikki barobar ko‘paytirishga xizmat qiladi. Rekonstruksiya tugagach, yo‘lovchilar uchun sayohat vaqti ham sezilarli qisqaradi.
O‘rtacha sayohat vaqti 25 daqiqadan 18 daqiqagacha kamayadi, avtobuslarning o‘rtacha tezligi esa 18,5 km/soatdan 23,6 km/soatgacha oshiriladi. Harakat oralig‘i taxminan 7 daqiqani tashkil etadi, bu esa yo‘lovchilarga qulaylik va vaqtni tejash imkonini beradi.
Ko‘chadagi infratuzilma ham tubdan yangilanadi. Bu doirada 11 ta yangi avtobus bekati, 500 ga yaqin zamonaviy avtoturargoh, velosiped yo‘laklari hamda 21 ta piyoda va velosiped o‘tish joylari barpo etiladi.
Yo‘l tarkibida 10 ta harakat yo‘lagi mavjud bo‘lib, ulardan 6 tasi avtomobillar uchun, 2 tasi avtobuslar uchun, qolgan 2 tasi esa to‘xtash joylari va yo‘lovchilar xavfsizligini ta’minlash uchun ajratilgan. Transport vazirligi bildirishicha, rekonstruksiya yakunlangach, avtobuslar harakat jadvali qayta ko‘rib chiqiladi, tirbandliklarning oldini olish va yo‘lovchilar uchun xavfsiz, qulay transport xizmatlarini ta’minlash bo‘yicha aniq chora-tadbirlar amalga oshiriladi (manba: zamin.uz).
