Toshkentda arzon mahsulotlar yarmarkalarida nazorat kuchaytirildi
Toshkent shahar hokimligi matbuot xizmatining ma’lumotiga ko‘ra, poytaxtda aholiga arzon narxlarda mahsulot yetkazib berish maqsadida tashkil etilgan maxsus savdo yarmarkalarida nazorat kuchaytirilmoqda. Bu haqida Zamin.uz xabar berdi.
Hokimlik va prokuratura departamenti tashabbusi bilan yirik bozorlarda arzonlashtirilgan mahsulotlar yarmarkalari yo‘lga qo‘yilgan edi. So‘nggi kunlarda ijtimoiy tarmoqlarda ayrim sotuvchilar rasmiy e’lon qilingan narxlardan farq qilib savdo qilayotgani haqida xabarlar tarqaldi, bu esa aholining noroziligiga sabab bo‘ldi.
Shu sababli shaffoflikni ta’minlash va sun’iy narx oshirishning oldini olish maqsadida arzon mahsulotlar sotiladigan rastalarda kuzatuv kameralari o‘rnatildi. Hozircha Mirobod dehqon bozori va “Eski Juva” (Chorsu) bozorida kameralar o‘rnatish ishlari yakunlandi.
Bu jarayon bosqichma-bosqich davom ettiriladi va yaqin kelajakda poytaxtdagi barcha yirik bozorlarning arzon yarmarkalarida to‘liq kamera nazorati joriy qilinadi. Mazkur choralar orqali narxlar ustidan qat’iy nazorat o‘rnatilib, savdoda oshkoralik ta’minlanishi va aholiga mo‘ljallangan arzon mahsulotlar belgilangan narxlarda sotilishi ko‘zda tutilmoqda (manba: zamin.uz).
