O‘zbekistonda nikohni rasmiylashtirish jarayonida yangi tartib joriy qilinadi. Bu haqida Zamin.uz xabar berdi.
Prezident tomonidan 8 sentyabr kuni imzolangan “Davlat xizmatlarini ko‘rsatish tizimini takomillashtirish hamda sohada byurokratik tartibotlarni tubdan qisqartirishga doir qo‘shimcha chora-tadbirlar to‘g‘risida”gi farmonga muvofiq, 2025 yil 1 dekabrdan boshlab Fuqarolik holati dalolatnomalarini yozish organlari nikohlanayotgan shaxslardan tibbiy ko‘rik ma’lumotnomasini talab qilmaydi. Bu haqda kursiv.media xabar berdi.
Yangi tartib joriy etilishi bilan nikoh rasmiylashtirishda mavjud bo‘lgan byurokratik to‘siqlar kamayadi. Avval nikohga kirayotgan yoshlar tibbiy ko‘rikdan o‘tganlik haqidagi ma’lumotnomani taqdim etishlari shart bo‘lgan.
Endilikda esa bu talab bekor qilinadi. Bu o‘zgarish yoshlarga vaqt va mablag‘ni tejash imkonini beradi hamda hayotni yengillashtiradi.
Farmon faqat nikoh masalasini emas, balki davlat xizmatlarini raqamlashtirish va soddalashtirishni ham ko‘zda tutadi. Hujjatga ko‘ra, 2028 yilga qadar Yagona interaktiv davlat xizmatlari portali (my.gov.uz) va davlat xizmatlari markazlari orqali ko‘rsatiladigan xizmatlar soni 900 taga yetkaziladi.
Shuningdek, proaktiv davlat xizmatlari 53 taga, kompozit davlat xizmatlari esa 74 taga ko‘paytiriladi. Bu raqamlar davlat xizmatlarini fuqarolar uchun yanada qulay va samarali qilishga qaratilgan.
Bundan tashqari, 2025 yil 1 dekabrdan idoralararo axborot almashinuvini yo‘lga qo‘yish orqali bir qator ortiqcha talablar ham bekor qilinadi. Jumladan, nikohni rasmiylashtirishda tibbiy ma’lumotnoma taqdim etish majburiyati, sud qarori asosida nikohdan ajralganda Fuqarolik holati dalolatnomalarini yozish organlari uchun alohida dalolatnoma olib kelish talabi, shuningdek, avtotransport vositasining ro‘yxatdan o‘tganlik guvohnomasida mulkdorning manzilini ko‘rsatish sharti bekor qilinadi.
Ushbu o‘zgarishlar davlat xizmatlarini yanada soddalashtirish va fuqarolarga qulaylik yaratishga qaratilgan muhim qadamdir. Manba: kursiv.media.
