Yuqori sinflarda sun’iy intellekt bo‘yicha maxsus darslar joriy etiladi. Bu haqida Zamin.uz xabar berdi.
Bu orqali iqtidorli o‘quvchilarga yangi imkoniyatlar yaratilib, ularning kelajakdagi kasbiy rivojlanishi uchun sharoitlar kengaytiriladi. Ushbu qaror 2023-yil 9-sentyabr kuni Prezident Shavkat Mirziyoyev raisligida ta’lim sohasidagi islohotlar ijrosi va ustuvor vazifalarga bag‘ishlangan videoselektor yig‘ilishida e’lon qilindi.
Ma’lum qilinishicha, 2024-yildan boshlab 1-sinflar uchun axborot texnologiyalari darslari yo‘lga qo‘yilgan bo‘lsa, keyingi o‘quv yilidan yuqori sinflarda sun’iy intellekt bo‘yicha maxsus darslar ham taqdim etiladi. Bu dastur yoshlarning zamonaviy texnologiyalarni chuqur o‘zlashtirishiga va murakkab masalalarni hal qilish qobiliyatini oshirishga qaratilgan.
Mamlakatdagi 2000 sinfxonaga kompyuterlar o‘rnatilib, 6300 ta interfaol doska jihozlanadi. Ushbu ehtiyojlarni qondirish uchun zarur mablag‘lar davlat byudjetiga kiritilishi rejalashtirilgan.
Bundan tashqari, viloyatlarda iqtidorli o‘quvchilar uchun maxsus maktablar tashkil etiladi. Jumladan, axborot texnologiyalari bo‘yicha Al-Xorazmiy maktabi, muhandislik yo‘nalishi bo‘yicha Mirzo Ulug‘bek maktabi hamda tabiiy fanlar yo‘nalishida Ibn Sino maktabi filiallari ochiladi.
Ushbu maktablar tegishli texnika oliygohlariga nomma-nom biriktiriladi va bitiruvchilar oliy ta’lim muassasalarining 2-kursiga avtomatik qabul qilinadi. Shuningdek, 2026-yilda O‘zbekistonda ilk bor Markaziy Osiyo davlatlari doirasida xalqaro kimyo va informatika olimpiadalari o‘tkaziladi.
Bosh vazirga poytaxtda ushbu olimpiadalarni yuqori saviyada tashkil etish va tashkiliy jarayonlarni nazorat qilish topshirildi. Eslatib o‘tamiz, joriy yil boshidan O‘zbekiston o‘quvchilari xalqaro fan olimpiadalarida 195 ta medalga sazovor bo‘lgan.
Ular uchun jami 10 milliard so‘m, murabbiylar va o‘qituvchilarga esa 3,5 milliard so‘m miqdorida pul mukofoti ajratilgan (manba: uza.uz).
