O‘zbekistondagi kanallarga xalqaro mukofot berildi
O‘zbekistonda suv xo‘jaligi sohasida muhim yutuqqa erishildi. Bu haqida Zamin.uz xabar berdi.
Mamlakatdagi “Do‘stlik” va “Eski Tuyatortar” kanallari xalqaro irrigatsiya merosi sifatida e’tirof etildi. Bu haqda Suv xo‘jaligi vazirligi Axborot xizmati ma’lumot berdi.
2025 yil uchun beriladigan “WHIS Award” mukofoti 100 yildan ortiq vaqt davomida foydalanib kelinayotgan, tarixiy ahamiyatga ega gidrotexnika inshootlariga taqdim etiladi. Ushbu mukofot Xalqaro irrigatsiya va drenaj komissiyasi tomonidan beriladi.
“Do‘stlik” kanali Sirdaryo havzasida joylashgan bo‘lib, O‘zbekiston va Qozog‘iston hududlaridan o‘tadigan yirik transchegaraviy irrigatsiya obyekti hisoblanadi. Kanal orqali minglab gektar yerlar sug‘oriladi va qishloq xo‘jaligi rivojiga katta hissa qo‘shiladi.
“Eski Tuyatortar” kanali esa Zarafshon daryosida joylashgan ko‘p asrlik tarixiy gidrotexnika inshootidir. U yuzlab yillar davomida suv taqsimoti va qishloq xo‘jaligi uchun asosiy manba bo‘lib xizmat qilgan.
Manba: suv.uz
