O‘zbekistonda elektron retsept joriy etildi

O‘zbekistonda tibbiyot xizmatlarini raqamlashtirish yo‘lida muhim yangilik joriy etildi. Bu haqida Zamin.uz xabar berdi.

Endilikda faqat retsept asosida beriladigan dori vositalari faqat elektron retsept orqali tayinlanadi. Bu tartib maxsus tasdiqlangan nizomda belgilangan.

Elektron retsept asosida beriladigan dorilar O‘zbekistonda ro‘yxatdan o‘tgan bo‘lishi shart. Davolovchi shifokor bemor haqidagi zarur ma’lumotlarni tibbiy muassasada ishlatilayotgan axborot tizimiga kiritadi.

So‘ngra bu ma’lumotlar avtomatik tarzda “Elektron tibbiy karta” moduliga uzatiladi. Shifokor bemorga elektron retsept tuzib, dori vositalarini tayinlaydi.

Retsept elektron shaklda tasdiqlanib, unga avtomatik ravishda QR-kod qo‘yiladi. Barcha zarur ma’lumotlar “Elektron retsept” modulida saqlanadi.

Shuningdek, shifokorlar tayinlangan dorilarning realizatsiya jarayonini kuzatib borish imkoniga ega bo‘ladi. Ya’ni, qaysi dori vositalari bemorga berilgani va ularning aylanmasi to‘liq nazorat ostida bo‘ladi.

Eng muhimi, elektron retseptga oid barcha ma’lumotlar bemorning shaxsiy elektron tibbiy kartasiga yozib boriladi. Bu esa shifokorlarga bemorning davolanish jarayoni va oldingi davrlarda qabul qilingan dorilar haqida to‘liq ma’lumot olish imkonini beradi.

Shu tariqa, tibbiy xizmatlar sifati oshadi va dori vositalarining noqonuniy aylanmasining oldi olinadi. Ma’lumot manbai: zamin.uz.