Toshkentda firibgarlik bilan bog‘liq 101 million so‘m o‘g‘irlandi
Toshkent viloyatida “Xavfsiz kibermakon” tezkor-profilaktika oyligi doirasida internet orqali sodir etilgan firibgarlik holati fosh etildi. Bu haqida Zamin.uz xabar berdi.
Viloyat Ichki ishlar bosh boshqarmasi tomonidan berilgan ma’lumotga ko‘ra, to‘rt nafar shaxs Instagram hamda Telegram ijtimoiy tarmoqlarida soxta sahifalar yaratib, o‘zlarini erkaklar kiyimlari do‘koni sifatida tanishtirgan. Ular arzon narxlarda kiyim mahsulotlarini taklif qilib, mijozlarni oldindan pul o‘tkazishga undagan.
Olingan mablag‘lar begona shaxslar nomiga rasmiylashtirilgan bank kartalariga yo‘naltirilib, keyinchalik shaxsiy ehtiyojlar uchun ishlatilgan. Tergov ma’lumotlariga ko‘ra, joriy yilning 11 iyun kuni Toshkent tumanida yashovchi fuqaro reklama qilingan kiyimni sotib olish uchun firibgarlar ko‘rsatgan bank kartasiga 1 million so‘m o‘tkazgan.
Biroq mablag‘ o‘tkazilgach, barcha yozishmalar o‘chirilgan va muloqot to‘xtatilgan. Dastlabki tergov natijalari shuni ko‘rsatadiki, so‘nggi bir oy ichida ushbu shaxslar turli usullar bilan 279 ta bank kartasidan jami 101 million so‘mdan ortiq mablag‘ni aldov yo‘li bilan qo‘lga kiritgan.
Hozirda ularga nisbatan O‘zbekiston Respublikasi Jinoyat kodeksining 168-moddasi, ya’ni firibgarlik jinoyati bo‘yicha jinoiy ish qo‘zg‘atilgan. Tergov jarayonlari davom etmoqda va ushbu shaxslar qonun oldida javob berishi ta’kidlanmoqda.
Toshkent viloyati Ichki ishlar boshqarmasi barcha fuqarolarni onlayn xaridlar vaqtida ehtiyotkor bo‘lishga chaqirmoqda. Jumladan, shoshilmaslik, oldindan pul o‘tkazmaslik, arzon e’lonlarga ishonmaslik va faqat ishonchli sahifalar orqali buyurtma berish tavsiya etilmoqda.
Shuningdek, shubhali holatlarda tezkor ravishda ichki ishlar organlariga murojaat qilish zarurligi eslatib o‘tildi (Manba: Toshkent viloyati Ichki ishlar bosh boshqarmasi).
