Diyor Haydarov Matterhorn cho‘qqisini zabt etdi
O‘zbekistonlik mashhur alpinist Diyor Haydarov Alp tog‘larida joylashgan va dunyoning eng murakkab cho‘qqilaridan biri hisoblangan Matterhorn tog‘ini (4478 metr) muvaffaqiyatli zabt etdi. Bu haqda Zamin.uz xabar berdi.
Ushbu yutuq uning shaxsiy sport faoliyati uchun muhim bo‘lgani bilan birga, O‘zbekistonning xalqaro sport maydonidagi nufuzini oshirishga ham xizmat qildi. Ko‘tarilish Shveysariyaning Zermatt shahridan (1620 metr) boshlandi.
Diyor dastlab Xornli boshpanasiga (3260 metr) yetib bordi va qisqa muddatli akklimatizatsiya mashg‘ulotlarini o‘tkazdi. Erta tongda u va uning jamoasi qiyin toshli yo‘llardan yurib, 4000 metr balandlikda muzli hududlarga duch keldi.
Bu paytda Haydarovning kramponlari bilan texnik muammolar yuzaga keldi, ammo u muz boltasidan foydalanib, yo‘lini davom ettirdi va barcha qiyinchiliklarni yengib o‘tdi. To‘rt soat ichida Matterhorn cho‘qqisiga chiqqan Diyor besh soat ichida xavfsiz pastga tushdi.
Ushbu ko‘tarilish nafaqat jismoniy chidamlilik va texnikani, balki psixologik barqarorlik ham talab qildi. Diyor Haydarovning ilgari erishgan yutuqlari ham e’tiborga loyiqdir.
2025 yil iyul oyida u Ozarbayjonning eng baland cho‘qqisi Bozarduzu (4466 metr)ni zabt etgan. Shuningdek, 2021 yilda Pomir tog‘laridagi Abu Ali ibn Sino cho‘qqisiga (7134 metr) ko‘tarilib, davlat mustaqilligining 30 yilligiga bag‘ishlab O‘zbekiston bayrog‘ini ko‘targan.
Uning so‘nggi yutug‘i o‘zbekistonlik sportchilarning xalqaro alpinistik maydondagi faol ishtirokini yana bir bor tasdiqladi. Bu kabi muvaffaqiyatlar nafaqat mamlakat sporti uchun ilhom manbai, balki yosh avlod orasida sportga bo‘lgan qiziqishni oshirishga xizmat qiladi.
Manba: zamin.uz
