O‘zbekiston merganlari xalqaro musobaqada g‘olib bo‘ldi
2025-yil 8-15 sentyabr kunlari Koreya armiyasining Maxsus operatsiya kuchlari qo‘mondonligi tomonidan tashkil etilgan «II Xalqaro merganlar musobaqasi» katta qiziqish bilan o‘tkazildi. Bu haqda Zamin.uz xabar berdi.
Ushbu musobaqada dunyoning turli burchaklaridan kelgan 10 ta davlat vakillari ishtirok etdi. Umumiy hisobda 54 ta jamoa bellashdi va har bir ishtirokchi o‘zining yuqori mahorat va tayyorgarlik darajasini namoyish etdi.
O‘zbekiston sharafini himoya qilgan harbiy xizmatchilarimiz ushbu nufuzli musobaqada a’lo darajada natija ko‘rsatdi. Ular AQSH, Germaniya, Ruminiya, BAA, Qatar, Vetnam, Tailand hamda Mo‘g‘uliston kabi davlatlardan kelgan raqiblar orasida o‘z mahoratlarini namoyish qilib, birinchi o‘rinni qo‘lga kiritishdi.
Yakuniy hisobda O‘zbekiston jamoasi 539,5 ball to‘plab, barcha raqiblarini ortda qoldirdi. Ikkinchi o‘rinni 534,7 ball bilan Vetnam terma jamoasi, uchinchi o‘rinni esa 519,0 ball bilan AQSH jamoasi egalladi.
Bu yutuq harbiy xizmatchilarimizning mashaqqatli mehnati va yuqori tayyorgarligining yorqin ifodasi hisoblanadi. Qiziqarli jihati shundaki, 2024-yilda o‘tkazilgan musobaqada ham yurtdoshlarimiz kuchli ikkinchi o‘rinni qo‘lga kiritgan edi.
Shu bilan O‘zbekiston merganlari jahonning eng kuchli jamoalari qatorida o‘z o‘rnini mustahkamlab, mamlakat bayrog‘ini munosib tarzda baland ko‘tarishga erishdi (manba: zamin.uz).
