Xorijiy oliygohlarga 1320 davlat kvotasi berildi
Davlat komissiyasining qaroriga ko‘ra, 2025–2026 o‘quv yili uchun xorijiy va nodavlat oliy ta’lim muassasalariga jami 1320 ta davlat buyurtmasi kvotasi tasdiqlandi. Bu haqda Zamin.uz xabar berdi.
Shu munosabat bilan, 2025 yil 29 sentyabrdan 5 oktyabrga qadar to‘lov-kontrakt asosida o‘qishga tavsiya etilgan yoshlar mazkur kvotalar doirasida abituriyent sifatida ro‘yxatdan o‘tish imkoniyatiga ega bo‘ladilar. Ro‘yxatdan o‘tishda ular tanlagan oliy ta’lim muassasasi va ta’lim yo‘nalishi hisobga olinadi.
Ro‘yxatdan o‘tgan abituriyentlar uchun 2025 yil 12 oktyabrga qadar test sinovlari o‘tkaziladi. Ushbu jarayonda belgilangan to‘lov undirilishi ham nazarda tutilgan.
Test natijalari asosida abituriyentlarning to‘plagan ballari qat’iy ketma-ketlikda shakllantirilib, 2025 yil 17 oktyabrga qadar tegishli oliy ta’lim muassasalariga rasmiy tarzda taqdim etiladi. Shuningdek, davlat oliy ta’lim muassasalariga kirish uchun ro‘yxatdan o‘tib, imtihon topshirgan, ammo talabalikka tavsiya etilmagan abituriyentlar ham ushbu tanlovda ishtirok etish huquqiga ega.
Ular o‘z ballari, fanlar majmuasi va ta’lim tili mos kelgan bakalavriat yo‘nalishlariga qayta tanlovdan o‘tish imkoniyatiga ega bo‘ladilar. Ma’lumotlar manbai: zamin.uz.
