Mahalliy hokimliklarda yangi boshqaruv tizimi joriy etiladi
O‘zbekistonda mahalliy davlat boshqaruv tizimini samarali tashkil etish, ortiqcha tuzilmalarni qisqartirish va faoliyatni shaffof qilish maqsadida yangi tartib joriy etilishi rejalashtirilmoqda. Bu haqda Zamin.uz xabar berdi.
Prezident farmoni loyihasi ishlab chiqilib, jamoatchilik muhokamasiga taqdim etildi. Bu haqda O‘zbekiston Milliy axborot agentligi xabar berdi.
Loyihaga ko‘ra, 2026 yil oxirigacha mamlakat bo‘ylab 32 ta tuman va shahar hokimliklarida yangi boshqaruv tizimi joriy etiladi. Yangi yondashuv asosida bir qator vazirlik va idoralarning hududiy bo‘linmalari hokimlik tarkibiga kiritiladi.
Xususan, Iqtisodiyot va moliya vazirligi, Investitsiyalar, sanoat va savdo vazirligi, Qishloq xo‘jaligi vazirligi, Kambag‘allikni qisqartirish va bandlik vazirligi, Qurilish va uy-joy kommunal xo‘jaligi vazirligi, Ekologiya, atrof-muhitni muhofaza qilish va iqlim o‘zgarishi vazirligi, Madaniyat vazirligi, Oila va xotin-qizlar qo‘mitasi hamda Yoshlar ishlari agentligi tuman va shahar hokimliklari tarkibiga o‘tkaziladi. Shu bilan birga, hokimliklardagi lavozimlar soni ham qisqartiriladi.
Hozirda har bir tuman va shahar hokimi 6 nafar o‘rinbosarga ega bo‘lsa, yangi tartibda ularning soni 4 nafar etib belgilanadi. Bu o‘zgarishlar mas’uliyat va hisobdorlikni oshirish bilan birga, byurokratiyani kamaytirishga qaratilgan.
Mutaxassislarning fikricha, mahalliy hokimliklardagi tuzilmalarni isloh qilish aholining davlat organlari bilan munosabatini soddalashtiradi, qaror qabul qilish jarayonlarini tezlashtiradi va korrupsiya xavfini kamaytirishga xizmat qiladi. Hujjatning yakuniy tasdig‘i va amalga oshirilishi natijasida hokimliklar faoliyati sifat jihatdan yangi bosqichga ko‘tarilishi kutilmoqda (manba: O‘zA).
