Yoshlarga chet tillarini o‘rganishga subsidiya beriladi
O‘zbekiston Respublikasi Vazirlar Mahkamasi yoshlarning chet tillarini o‘rganishini rag‘batlantirish maqsadida yangi qaror qabul qildi. Bu haqda Zamin.uz xabar berdi.
2025 yil 8 oktyabrda tasdiqlangan 632-sonli hujjatga asosan, til o‘rganishni istagan yoshlarga davlat tomonidan subsidiya ajratiladi. Bu subsidiya «2+6» dasturi doirasida amalga oshiriladi.
Dasturga ko‘ra, sertifikatga ega bo‘lgan yoshlar dastlabki ikki oy davomida o‘z hisobidan ta’lim oladi, keyingi olti oy esa Yoshlar ishlari agentligi jamg‘armasi mablag‘lari hisobidan subsidiyalashtiriladi. Subsidiya miqdori hududlarga qarab farq qiladi.
Toshkent shahrida bu miqdor YaHMning ikki baravarigacha, ya’ni 824 ming so‘mgacha belgilangan. Viloyat markazlarida esa 1,5 baravar, ya’ni 618 ming so‘mgacha subsidiyalar beriladi.
Tuman va shaharlarda esa bu ko‘rsatkich YaHMning bir baravarigacha, ya’ni 412 ming so‘mni tashkil etadi. 2025–2026 yillarda jami 20 ming nafargacha yoshlar subsidiya olish imkoniyatiga ega bo‘ladi.
Bundan tashqari, 2031 yilgacha har yili shuncha miqdorda yoshlar uchun grantlar ajratilishi rejalashtirilgan. Agar yillik limit to‘lsa, arizalar keyingi yilga ko‘chiriladi.
Subsidiya faqat elektron platformada ro‘yxatdan o‘tgan hamda ta’lim jarayonida qatnashuv elektron tarzda nazorat qilinadigan o‘quv markazlariga beriladi. Bu chora mahsuldorlikni ta’minlash va nazoratni kuchaytirish maqsadida joriy etilmoqda.
Manba: One.uz
