Yoshlar xorijiy tillarni o‘rganishda subsidiya oladi
Hukumat qarori bilan “Yoshlarni xorijiy tillarni o‘quv markazlarida o‘rganish xarajatlarini qisman qoplash uchun subsidiyalar berish tartibi to‘g‘risidagi nizom” tasdiqlandi. Bu haqda Zamin.uz xabar berdi.
Ushbu nizomga muvofiq, “2+6” dasturi joriy etiladi. Dasturga ko‘ra, xorijiy til bo‘yicha kamida bazaviy sertifikatga ega yoshlar dastlabki ikki oy o‘z mablag‘i hisobidan o‘qiydi.
Keyingi olti oy davomida esa davlat tomonidan subsidiya ajratiladi. Subsidiyalar Yoshlar ishlari agentligi huzuridagi Davlat yoshlar siyosati qo‘llab-quvvatlash jamg‘armasi tomonidan taqdim etiladi.
Subsidiyalar miqdori joylashuvga qarab farqlanadi. Toshkent shahrida oyiga ikki bazaviy hisoblash miqdoriga qadar, viloyat markazlari va Qoraqalpog‘iston Respublikasida bir yarim bazaviy hisoblash miqdorigacha, tumanlarda esa bir bazaviy hisoblash miqdorigacha subsidiya beriladi.
2025–2026-yillarda jami 20 ming nafar yoshga subsidiya ajratilishi rejalashtirilgan. Bundan tashqari, 2031-yilgacha har yili yana 20 ming nafar ishtirokchiga davlat yordami ko‘rsatiladi.
Agar yil davomida ajratiladigan limit oshib ketilsa, subsidiya to‘lovlari keyingi yilgacha to‘xtatiladi. Subsidiyalar faqat faoliyat yuritayotgan, reyting platformasiga ro‘yxatdan o‘tgan va elektron darsga qatnashuvni kuzatish tizimiga ulangan o‘quv markazlariga beriladi.
Ushbu tartib yoshlarning xorijiy tillarni o‘rganish imkoniyatlarini kengaytirishga qaratilgan. Manba: UzNews.uz
