Bugun, 14 oktyabr kuni, O‘zbekiston Respublikasi Prezidenti Shavkat Mirziyoyev Rossiya Federatsiyasi Prezidenti Vladimir Putin bilan telefon orqali muhim muloqot o‘tkazdi. Bu haqda Zamin.uz xabar berdi.
Suhbat davomida ikki davlat rahbarlari strategik sheriklik va ittifoqchilik munosabatlarini yanada mustahkamlash, amaliy hamkorlik sohalarini kengaytirish masalalarini muhokama qildi. Prezidentlar o‘zaro kelishuvlarni izchil amalga oshirish zarurligini ta’kidlab, ikki mamlakat o‘rtasidagi aloqalar tobora amaliy yo‘nalishga o‘tayotganini qayd etdi.
Savdo, sanoat, qishloq xo‘jaligi va energetika sohalaridagi hamkorlik ko‘rsatkichlari barqaror o‘sib borayotgani alohida ta’kidlandi. Shuningdek, mintaqaviy darajadagi qo‘shma loyihalarni qo‘llab-quvvatlash, yangi investitsiya imkoniyatlarini yaratish va logistika infratuzilmasini yaxshilash masalalari muhokama qilindi.
Gumanitar sohadagi hamkorlik, xususan madaniyat, san’at va ta’lim yo‘nalishlaridagi aloqalarning kuchayib borayotgani ijobiy baholandi. Prezidentlar muhandislik kadrlarini tayyorlash, ilmiy tajriba almashish va ikki davlat talabalari uchun ta’lim imkoniyatlarini kengaytirish bo‘yicha olib borilayotgan ishlarni yuqori darajada qadrlashdi.
Shuningdek, yaqin kelajakda bo‘lib o‘tadigan qo‘shma tadbirlar rejasi ko‘rib chiqildi. Suhbat yakunida Shavkat Mirziyoyev va Vladimir Putin o‘zaro ishonch va do‘stona munosabatlarga tayangan holda strategik hamkorlikni yanada chuqurlashtirishga tayyor ekanliklarini bildirdi.
Ushbu muloqot ikki davlat o‘rtasidagi munosabatlarning navbatdagi muhim bosqichi bo‘lib, O‘zbekiston va Rossiya hamkorligining barqaror va pragmatik yo‘nalishda rivojlanayotganini yana bir bor tasdiqladi (manba: Prezident.uz).
