O‘zbekiston bo‘ylab umumrespublika tozalik oyligi boshlanadi
Prezidentning topshirig‘iga muvofiq, 15-oktyabrdan boshlab butun O‘zbekiston bo‘ylab umumrespublika tozalik va obodonlashtirish oyligi boshlanadi. Bu haqda Zamin.uz xabar berdi.
Bu haqda Ekologiya, atrof-muhitni muhofaza qilish va iqlim o‘zgarishi vazirligi axborot xizmati ma’lum qildi. Oylik davomida mamlakatning barcha hududlarida, ya’ni mahalla va qishloqlardan tortib shahar markazlarigacha tozalik, hududlarni obod qilish hamda ekotartibni ta’minlash ishlari amalga oshiriladi.
Ushbu tadbirda davlat tashkilotlari, ta’lim muassasalari, yoshlar va volontyorlar keng ko‘lamda ishtirok etadi. Maktablar, bog‘chalar, ko‘chalar, aholi turar joylari, bog‘lar va dam olish joylarida ommaviy hasharlar tashkil qilinadi.
Shuningdek, yosh eko-faollar va volontyorlar ishtirokida “plogging” — ya’ni yugurish bilan birga chiqindilarni yig‘ish tadbirlari o‘tkaziladi. Ekologiya vazirligi rahbariyati, mahalliy hokimliklar va tashkilotlar rahbarlari ham shaxsan ishtirok etib, namuna ko‘rsatishlari kutilmoqda.
Oylik davomida Bosh prokuratura, Milliy gvardiya, Ichki ishlar vazirligi va Ekologiya vazirligi hamkorligida maxsus shtablar tashkil etiladi. Ular viloyat, tuman va shaharlarda ekologik nazoratni kuchaytirib, jamoatchilikka har kuni axborot taqdim etadi.
Shuningdek, ekologik huquqbuzarliklarga qarshi doimiy reydlar o‘tkaziladi. Hozirda barcha hududlarda o‘rnatilgan onlayn kuzatuv kameralari yordamida nazorat yanada mustahkamlanmoqda.
Bu tashabbusning asosiy maqsadi atrof-muhitni tozalash bilan birga aholida ekologik madaniyatni shakllantirishdir. Vazirlik bayonotida aytilishicha, tozalikni bir kunlik emas, balki har kunlik odatga aylantirish muhim vazifa hisoblanadi (manba: ekologiya vazirligi axborot xizmati).
