O‘zbekistonda sport bilan shug‘ullanish oshmoqda

O‘zbekistonda sog‘lom turmush tarziga qiziqish yil sayin ortib bormoqda. Bu haqda Zamin.uz xabar berdi.

Milliy statistika qo‘mitasining 2025 yil yanvar-avgust oylaridagi ma’lumotlariga ko‘ra, mamlakat aholisi orasida jismoniy mashg‘ulotlar bilan shug‘ullanish darajasi sezilarli darajada oshgan. Ayniqsa, erkaklar orasida sport bilan muntazam shug‘ullanadiganlar soni 71,9 foizni tashkil etdi.

Bu ko‘rsatkich 2024 yilga nisbatan 0,2 foizga yuqori. Ayollar orasida ham sport bilan shug‘ullanish odatiga ega bo‘lganlar ulushi 64,1 foizga yetdi.

So‘nggi besh yil ichida bu ko‘rsatkichlar doimiy ravishda o‘sib bormoqda. Masalan, erkaklar orasida jismoniy faollik 2021 yilda 66 foiz bo‘lgan bo‘lsa, 2025 yilda 71,9 foizga yetdi.

Ayollarda esa 2021 yildagi 55,7 foizdan 2025 yilda 64,1 foizgacha oshdi. Mutasaddilar fikricha, bu o‘sish sog‘lom turmush tarzini targ‘ib qilish ishlari bilan birga, yangi sport infratuzilmalarining hududlarda barpo etilishi bilan bog‘liq.

So‘nggi yillarda deyarli har bir tuman va shaharda sport maydonchalari, fitnes markazlari hamda ochiq havodagi trenajyorlar soni ko‘paymoqda. Bu esa aholi sog‘ligini mustahkamlash va jismoniy faollikni oshirishga xizmat qilmoqda.

Manba: Milliy statistika qo‘mitasi.