Toshkentda Shota Rustaveli ko‘chasi yangilandi
Prezident Shavkat Mirziyoyev 15 oktyabr kuni Toshkent shahrining Yakkasaroy tumanida joylashgan Shota Rustaveli ko‘chasida amalga oshirilgan rekonstruksiya ishlarini ko‘zdan kechirdi. Bu haqda Zamin.uz xabar berdi.
Ushbu ko‘cha poytaxtning bir necha tumanlarini bog‘lovchi markaziy yo‘l hisoblanadi. Transport harakatini yaxshilash maqsadida Mirobod ko‘chasidan Choshtepa ko‘chasigacha bo‘lgan, taxminan 7 kilometr uzunlikdagi yo‘l qismi to‘liq rekonstruksiya qilindi.
Endilikda yo‘l 10 qatnov qismiga bo‘lingan bo‘lib, ulardan 6 tasi avtomobillar uchun, 2 tasi maxsus ajratilgan yo‘nalishlarda avtobuslar uchun mo‘ljallangan. Qolgan 2 ta yo‘lak esa avtomobillar to‘xtab turishi uchun xizmat qiladi.
Davlat rahbari va jamoat tashkilotlari vakillari avtobusda yurib, yangi tashkil etilgan qulayliklarni o‘z ko‘zlari bilan ko‘rdi va yo‘lovchilar bilan suhbatlashdi. Ko‘chaning o‘rtasida BRT (Bus Rapid Transit) tizimi asosida ajratilgan avtobus yo‘lagi Toshkent shahrida birinchi marta joriy etildi.
Ushbu loyiha umumiy qiymati 19,2 million dollarni tashkil etib, yo‘lovchi oqimini soatiga 2500 dan 6000 kishigacha oshirdi. Shuningdek, yo‘l orqali sutkasiga 40 mingdan ortiq avtomobil o‘tishi mumkin bo‘ldi va transportning o‘rtacha tezligi soatiga 23 kilometrdan 30 kilometrga yetkazildi.
Loyiha doirasida 21 ta yangi avtobus bekati, 463 ta «aqlli» svetofor o‘rnatildi. Intellektual transport boshqaruv tizimi joriy qilindi.
Yo‘l bo‘yida avtomobillar to‘xtab turishi uchun ham qulayliklar yaratildi. Bundan tashqari, velosiped yo‘laklari, yashil hududlar, sug‘orish va drenaj tizimlari barpo etildi.
Toshkent shahrida ajratilgan avtobus yo‘laklarini uzaytirish va shahar atrofida transport bog‘lamalarini tashkil etish bo‘yicha loyihalar ham taqdim etildi. Prezident Mirziyoyev so‘zlarida, agar metro yo‘llari qurilmagan va yangi avtobuslar olib kelinmaganida, bugungi kunda Toshkentda transport qatnovi qiyin bo‘lishini ta’kidladi.
Shu sababli, yo‘llarni to‘g‘rilash va jamoat transportini rivojlantirish ishlari barcha shaharlar bo‘ylab davom ettirilishini bildirdi. Davlat rahbari mutasaddilarga jamoat transporti uchun qulayliklarni oshirish, tirbandlikni kamaytirish va shaharni Yangi Toshkent bilan samarali bog‘lash bo‘yicha aniq topshiriqlar berdi (manba: zamin.uz).
