O‘zbekistonda ob-havo erta soviy boshlaydi
O‘zbekistonda bugungi iliq va quruq ob-havodan so‘ng, ertadan boshlab salqinlik kirishi kutilmoqda. Bu haqda Zamin.uz xabar berdi.
Bu haqda Ekologiya, atrof-muhitni muhofaza qilish va iqlim o‘zgarishi vazirligi huzuridagi Gidrometeorologiya xizmati agentligi ma’lum qildi. Mutaxassislarning aytishicha, 17-oktyabr kuni respublika bo‘yicha yozga xos iliq ob-havo saqlanmoqda.
Harorat markaziy hududlarda 23–28 daraja, shimoliy viloyatlarda esa 20–25 daraja atrofida bo‘lmoqda. Biroq bu iliqlik uzoq davom etmaydi.
18-oktyabr kuni shimoli-g‘arbdan yangi, salqin havo massalari kirib kelishi kutilmoqda. Agentlik ma’lumotlariga ko‘ra, yangi havo oqimi tufayli harorat asta-sekin pasayadi.
18-oktyabr kuni kunduzi harorat 21–26 daraja, shimolda esa 15–20 daraja atrofida bo‘ladi. 19-oktyabrga kelib esa bu ko‘rsatkich markaziy hududlarda 18–23 darajagacha, shimoliy viloyatlarda 13–18 darajagacha tushishi mumkin.
Kechasi havo yanada soviydi va harorat 6–11 daraja, ayrim shimoliy hududlarda esa 3–8 darajagacha pasayadi. Dam olish kunlari asosan yog‘ingarchiliksiz va barqaror ob-havo saqlanadi.
Biroq 18-oktyabr kechga tomon Buxoro va Navoiy viloyatlarida qisqa muddatli yomg‘ir yog‘ishi mumkin. 19-oktyabr kuni tog‘oldi va tog‘li hududlarda qisqa muddatli yomg‘ir, baland tog‘larda esa qor yog‘ishi ehtimoli mavjud.
Shamolning tezligi o‘rtacha 7–12 metr soniyada bo‘ladi. Poytaxt Toshkentda ob-havo o‘zgaruvchan bo‘lib, yog‘ingarchilik kutilmaydi.
Shamol sharqdan 3–8 metr soniyada tezlikda esadi. Harorat 17-oktyabr kuni kunduzi 25–27 daraja, 18-oktyabrda 23–25 daraja, 19-oktyabrda esa 19–21 darajagacha pasayadi.
Tungi harorat esa asta-sekin 8–10 darajagacha tushishi kutilmoqda. Manba: uzhydromet.uz
