Toshkentdagi savdo va ko‘ngilochar markazlarda faoliyat yuritayotgan suratchilar o‘zini haddan tashqari oshirib, fuqarolar orasida norozilik uyg‘otmoqda. Bu haqda Zamin.uz xabar berdi.
Ayniqsa, High Town Mall savdo markazida ayrim suratchilar ota-onalarning roziligisiz bolalarni suratga olib, keyinchalik ular suratlari tushirilgan magnit yoki krujka kabi mahsulotlarni majburiy sotishga harakat qilmoqda. Bolalarni quvib yurish va maydonchadan chiqqan zahoti ota-onalarga murojaat qilish kabi holatlar ko‘p uchraydi.
UPL muxbiri eksperiment sifatida bolalarining suratlari tushirilgan ikki magnitni 60 ming so‘mdan sotib oldi. Ko‘p o‘tmay boshqa suratchi kelib, bolalar krujkalarini buyurtma qilganini aytib, har biri uchun 100 ming so‘m talab qildi.
Bu kabi holatlar nafaqat mahalliy aholi, balki sayyohlar orasida ham salbiy taassurot qoldirmoqda. Shu sababli O‘zbekistonda shaxs va bolalarni suratga olish uchun alohida ruxsatnoma olish majburiyligini belgilaydigan huquqiy hujjat ishlab chiqilmoqda.
Kelgusida bunday holatlarga nisbatan qonuniy choralar ko‘rilishi kutilmoqda (manba: UPL).
