Toshkentda yuk mashinalariga yangi harakat cheklovi joriy qilindi
Toshkent shahrida yo‘llardagi tirbandlikni kamaytirish maqsadida yuk avtomobillarining harakatiga yangi cheklov joriy qilindi. Bu haqda Zamin.uz xabar berdi.
Endilikda ertalab va kechki tig‘iz soatlarda poytaxtga kelgan yuk mashinalari shaharga darhol kira olmaydi. Bu haqda ichki ishlar vaziri Aziz Toshpo‘latov “Menimcha” dasturida ma’lum qildi.
Uning so‘zlariga ko‘ra, ushbu qaror shahar markazidagi harakatni yengillashtirish va ekologik vaziyatni yaxshilash uchun qabul qilindi. Yuk mashinalari uchun Toshkentga kirish nuqtalarida beshta maxsus avtoturargoh qurish rejalashtirilgan.
Bu joylar “Erkin”, “Sharq”, “Bektemir”, “Uch qahramon” hamda “Turbanov” postlari hududida joylashadi. Shuningdek, ularda avtovokzal va kempinglar ham tashkil etiladi.
Ayrim obyektlar uchun 7,7 gektar, 4,25 gektar va 8 gektar yer maydonlari ajratilishi ko‘zda tutilgan. Eng band nuqta hisoblangan “Erkin” postidan kuniga 40-50 minggacha avtomobil o‘tishi qayd etilgan.
Shu sababli, ushbu hududda nazorat va tartib kuchaytiriladi. Yangi tizimga ko‘ra, agar yuk mashinasi Samarqanddan kelib, Toshkentga ertalab soat 8:00 atrofida yetib kelsa, u yerda joylashgan avtoturargohda uch soat kutib turadi.
Faqat belgilangan vaqt o‘tgach, shaharga kirishga ruxsat beriladi. Aziz Toshpo‘latovning ta’kidlashicha, bu choralar orqali ertalab va kechki tirband vaqtlarda harakat cheklanadi, qolgan paytlarda esa mikroavtobuslar va yengil transport vositalari erkin harakat qilishi ta’minlanadi.
Mazkur tashabbusning asosiy maqsadi poytaxtdagi yo‘l yuklamasini kamaytirish, harakat xavfsizligini oshirish hamda fuqarolar uchun qulay transport muhitini yaratishdir. Manba: zamin.uz
