Mirziyoyev Islom sivilizatsiyasi markazida bo‘ldi
Prezident Shavkat Mirziyoyev 20 oktyabr kuni Toshkent shahridagi Islom sivilizatsiyasi markaziga tashrif buyurdi. Bu haqda Zamin.uz xabar berdi.
U markazdagi ekspozitsiyalar bilan yaqindan tanishib, xalqimizning boy tarixiy va ma’naviy merosini keng targ‘ib etishga qaratilgan ishlar haqida ma’lumot oldi. Markazning markaziy qismida Qur’oni Karim zali joylashgan bo‘lib, unda musulmon olamining nodir durdonasi hisoblangan qadimiy Usmon Mus’hafi namoyish etiladi.
Shuningdek, Somoniylar, Qoraxoniylar, Xorazmshohlar, Temuriylar va boshqa sulolalar davriga oid muqaddas kitoblar, ularning eski o‘zbek tilidagi tarjimalari hamda jahondagi eng noyob qo‘lyozma Qur’onlar ko‘rgazmaga qo‘yilgan. Markazda “Islomdan avvalgi sivilizatsiyalar”, “Birinchi Renessans”, “Ikkinchi Renessans”, “O‘zbekiston XX asrda” va “Yangi O‘zbekiston – yangi Renessans” bo‘limlari tashkil etilgan.
Bu bo‘limlarda buyuk allomalar faoliyati, jumladan Imom Buxoriy, Imom Termiziy, Abu Mansur Moturidiy, Bahouddin Naqshband va boshqa ulamolar merosi keng yoritilgan. Tarixda ilm-fan va ma’naviyat homiysi bo‘lgan Bibixonim, Nodirabegim, Uvaysiy va Anbar Otin kabi mashhur shaxslarning faoliyati ham alohida ekspozitsiya sifatida namoyish etilgan.
Davlat rahbari markazning ilmiy-ma’rifiy yo‘nalishini samarali tashkil etish va mazmun-mohiyatini boyitish zarurligini ta’kidladi. Shu maqsadda O‘zbekiston xalqaro islomshunoslik akademiyasi, Imom Buxoriy, Imom Termiziy va Imom Moturidiy nomidagi ilmiy markazlar bilan hamkorlikni kuchaytirish bo‘yicha olib borilayotgan ishlar haqida axborot berildi.
Tashrif davomida prezident zallardagi ta’mirlash va jihozlash ishlarini ko‘zdan kechirdi, bo‘limlar va ko‘rgazmalarning mazmuni hamda qo‘llanilayotgan interfaol texnologiyalar bilan yaqindan tanishdi. Shavkat Mirziyoyev eksponatlarni mahalliy va xorijiy tashrif buyuruvchilar uchun qiziqarli va tushunarli tarzda taqdim etish muhimligini qayd etdi.
Bu borada markazda faoliyat yuritadigan mutaxassislar va gidlarning sonini ko‘paytirish, ularni maxsus dasturlar asosida tayyorlash zarurligini ta’kidladi. Shuningdek, markaz faoliyatini yanada boyitish, ekspozitsiyalar orqali ma’naviy va ilmiy merosni to‘liq taqdim etish bo‘yicha bir qator tavsiyalar berildi (manba: zamin.uz).
