Toshkent shahrida Koreya Respublikasi bilan hamkorlikda zamonaviy tibbiyot klasteri tashkil etilishi rejalashtirilmoqda. Bu haqda Zamin.uz xabar berdi.
Bu haqda Sog‘liqni saqlash vazirligi ma’lum qildi. Loyiha Koreya Eksimbanki hamda Iqtisodiy rivojlanish va hamkorlik fondi (EDCF) ishtirokida amalga oshiriladi.
Kattalar uchun ko‘p tarmoqli tibbiyot markazi qurilishi bo‘yicha asosiy pudratchi sifatida Kyeryong konsorsiumi tanlangan. Ushbu konsorsium rahbari va Sog‘liqni saqlash vaziri o‘rtasida shartnoma imzolanishi bilan loyiha rasmiy ravishda boshlangani ma’lum bo‘ldi.
Qurilishning umumiy qiymati 149,8 million AQSH dollarini tashkil etadi. Shundan 124 million dollari Koreya Eksimbanki orqali EDCF kredit mablag‘lari hisobidan, qolgan 25,8 million dollari esa O‘zbekiston tomonidan moliyalashtiriladi.
Yangi shifoxona jahon standartlariga mos keladigan IV darajali zamonaviy tibbiyot markazi ko‘rinishida barpo etiladi. Uning sig‘imi 300 o‘rin bo‘lib, bu yerda 700 nafardan ortiq shifokor va tibbiyot xodimi uchun yangi ish o‘rinlari yaratiladi.
Loyiha doirasida 130 nafar o‘zbekistonlik mutaxassislar malaka oshirish uchun Koreya Respublikasiga yuboriladi. Shuningdek, 32 nafar yuqori malakali koreyalik shifokor mamlakatimizga kelib, ilg‘or tajribalarini o‘rganish va o‘rgatish bo‘yicha faoliyat olib boradi.
Yangi markaz ishga tushgach, yiliga 8,5 mingdan ortiq yuqori texnologiyali jarrohlik amaliyotlari bajarilishi kutilmoqda. Ushbu jarrohliklar yurak qon-tomir tizimi, transplantologiya, neyroxirurgiya, reabilitatsiya, shuningdek, orqa miya va bo‘g‘im jarrohliklarini o‘z ichiga oladi.
Mutaxassislarning fikricha, mazkur loyiha nafaqat Toshkent, balki butun O‘zbekiston tibbiyot tizimi uchun yangi bosqich bo‘ladi. Bu orqali aholiga yuqori malakali va zamonaviy tibbiy xizmat ko‘rsatish imkoniyatlari kengayadi.
Ma’lumot uchun, 2020 yilda ham EDCF ishtirokida Toshkentda Markaziy Osiyoda yagona hisoblangan Bolalar milliy tibbiyot markazi foydalanishga topshirilgan edi. Yangi kattalar klinikasi esa ushbu yo‘nalishdagi xalqaro hamkorlikning navbatdagi bosqichidir (manba: sogliqni saqlash vazirligi).
