Lemmon kometasi 21-oktyabrda O‘zbekistonda ko‘rinadi
Bugun, 21-oktyabr kuni O‘zbekiston aholisiga noyob tabiiy hodisani kuzatish imkoniyati taqdim etiladi. Bu haqda Zamin.uz xabar berdi.
Astronomlarning ma’lumotlariga ko‘ra, C/2025 A6 (Lemmon) nomli yashil kometa Yerga eng yaqin masofadan o‘tadi. Bu hodisa juda kam uchraydi va olimlar uning keyingi takrorlanishi uchun kamida ming yil kutish kerakligini ta’kidlamoqda.
Mutaxassislarning fikricha, Lemmon kometasi bir necha oydan beri ichki Quyosh tizimiga yaqinlashib borayotgani sababli yorqinlashgan va inson ko‘zi bilan ko‘rinadigan darajaga yetgan. Astronom Stroudning so‘zlariga ko‘ra, Lemmon kometasi bu yil Yer osmonida eng ko‘zga tashlanadigan va jozibali kometalardan biri bo‘ladi.
Uning yashil rangga kirishi tarkibidagi ikki atomli uglerodning Quyosh nuri ta’sirida parchalanishi bilan bog‘liq. Bu jarayon kometaning bosh qismida yorqin yashil nur paydo bo‘lishiga olib keladi.
Kometani O‘zbekiston hududida Quyosh botganidan keyin, taxminan soat 19:00 dan 20:30 gacha kuzatish mumkin. Kuzatuv uchun shahar yorug‘ligidan uzoqroq, ochiq va baland joy tanlash tavsiya etiladi.
Teleskop shart emas, ammo toza osmon va yorug‘lik ifloslanishi kam bo‘lgan muhit muhim hisoblanadi. Astronomlar kometaning Yer uchun mutlaqo xavfsiz ekanligini, uning sayyoramiz orbitasiga hech qanday xavf tug‘dirmasligini alohida ta’kidlamoqda.
Ushbu ma’lumotlar “National Geographic” nashri tomonidan taqdim etilgan.
