Imtiyozli pensiya yoshiga yangi o‘zgarishlar kiritildi

Fuqarolarning davlat pensiya ta’minoti to‘g‘risidagi qonunga muvofiq, ayrim toifadagi fuqarolarga imtiyozli shartlarda pensiyaga chiqish huquqi beriladi. Bu haqda Zamin.uz xabar berdi.

Ushbu huquq ularning kasbi, ish sharoiti va mehnat stajiga bog‘liq holda belgilanadi. Yangi tartiblarga ko‘ra, ayrim sohalar xodimlari umumiy belgilangan pensiya yoshidan 5 yoki 10 yil ilgari nafaqaga chiqish imkoniyatiga ega bo‘ladi.

Xususan, urush nogironlari, bolalikdan nogiron farzand tarbiyalayotgan onalar, liliputlar va pakanalar ham imtiyozli pensiya olish huquqiga ega. Yoshidan qat’i nazar, quyidagi toifadagi fuqarolar pensiyaga ilgari chiqishi mumkin.

Birinchidan, konchilik sohasining yetakchi mutaxassislari, agar ularning ish staji kamida 20 yil bo‘lsa. Ikkinchidan, yer osti va ochiq kon ishlarida kamida 25 yil to‘liq ish kuni bilan faoliyat yuritgan shaxtyorlar va qurilish xodimlari.

Uchinchidan, uchuvchilar va sinov parvoz tarkibi vakillari, erkaklarda kamida 25 yil, ayollarda esa 20 yil ish tajribasi bo‘lishi kerak. Shuningdek, teatr va tomosha sohasi artistlari, ijodiy staji 20, 25 yoki 30 yil bo‘lsa, hamda sportchilarning ayrim toifalari, 20 yillik ish stajiga ega bo‘lsa, imtiyozli pensiyaga chiqish huquqiga ega hisoblanadi.

Bundan tashqari, imtiyozli pensiya beruvchi ishlab chiqarishlar, muassasalar, kasblar va lavozimlar ro‘yxatiga o‘zgartirish kiritish tartibi qayta ko‘rib chiqildi. Endilikda korxonalar ro‘yxatga o‘zgartirish yoki qo‘shimcha kiritish uchun mehnat sharoiti, xavfsizlik darajasi va jarohat xavfi bo‘yicha attestatsiyadan o‘tgan bo‘lishi lozim.

Yangi tartiblar ishchilarning mehnat sharoitiga qarab ularning ijtimoiy himoyasini yanada mustahkamlashga qaratilgan (manba: zamin.uz).