Mirziyoyev Bryusselda Yevropa yetakchilari bilan uchrashadi
Ertaga, 23 oktyabr kuni O‘zbekiston Respublikasi Prezidenti Shavkat Mirziyoyev rasmiy tashrif bilan Belgiya poytaxti Bryusselga boradi. Bu haqda Zamin.uz xabar berdi.
Davlat rahbarining matbuot xizmati tomonidan berilgan ma’lumotga ko‘ra, ushbu tashrif Yevropa Kengashi raisi Antoniu Koshta hamda Yevropa Komissiyasi prezidenti Ursula fon der Lyayenning taklifiga binoan amalga oshiriladi. Bryusselda Prezident Mirziyoyev Yevropa Ittifoqining yetakchi institutlari rahbarlari bilan ikki tomonlama muzokaralar olib boradi.
Uchrashuvlarda Samarqandda o‘tgan so‘nggi sammitda erishilgan kelishuvlarni amalga oshirish masalalari muhokama qilinadi. Shuningdek, savdo, investitsiya, innovatsiya, energetika hamda fan va ta’lim sohalaridagi hamkorlikni yanada rivojlantirish haqida fikr almashiladi.
Tashrif doirasida O‘zbekiston va Yevropa Ittifoqi o‘rtasida kengaytirilgan sheriklik va hamkorlik to‘g‘risidagi yangi bitim imzolanishi kutilmoqda. Bundan tashqari, Prezident Mirziyoyev Belgiya rahbariyati va Yevropa kompaniyalari hamda banklari rahbarlari bilan uchrashib, sanoat va texnologiya sohasidagi qo‘shma loyihalarni muhokama qiladi.
Davlat rahbarining matbuot xizmati ta’kidlashicha, ushbu tashrif O‘zbekiston va Yevropa Ittifoqi o‘rtasidagi munosabatlarni yangi bosqichga ko‘tarishga xizmat qiladi. Manba: zamin.uz
