O‘zbekistonda kasbiy ta’lim tizimini tubdan isloh qilish va zamon talablariga mos ravishda rivojlantirish maqsadida muhim o‘zgarishlar amalga oshirildi. Bu haqda Zamin.uz xabar berdi.
Prezidentning “Kasbiy ta’lim tizimida boshqaruv samaradorligini oshirish chora-tadbirlari to‘g‘risida”gi farmoni asosida Oliy ta’lim, fan va innovatsiyalar vazirligi huzurida Kasbiy ta’lim agentligi tashkil etildi. Ushbu yangi idora texnikumlar faoliyatini yagona boshqaruv tizimiga birlashtirish va malakali kadrlar tayyorlashda tizimli yondashuvni yo‘lga qo‘yishni ko‘zlaydi.
Agentlikning asosiy vazifalari qatoriga texnikumlarning ishini muvofiqlashtirish, ta’lim jarayonlarini samarali boshqarish, kasbiy ta’lim dasturlari mazmuni, malaka darajalari hamda o‘qitish muddatlarini belgilash kiradi. Shuningdek, bitiruvchilarning bilimlarini baholash mezonlarini yangilash va o‘quv-metodik ta’minotga yagona talablarni joriy etish ham muhim vazifalar sifatida belgilangan.
Agentlik kambag‘allikni qisqartirish va bandlik vazirligi bilan hamkorlikda “vaucher” tizimi orqali qamrab olinmagan fuqarolarni kasbga o‘qitish ishlarini ham amalga oshiradi. Bu orqali mehnat bozorida yetishmayotgan mutaxassislar tayyorlanadi.
Shuningdek, Migratsiya agentligi bilan hamkorlikda xorijiy ish beruvchilar ehtiyojidan kelib chiqib, fuqarolarni zamonaviy kasblar va chet tillariga o‘qitish dasturlari yo‘lga qo‘yiladi. Farmonga muvofiq, 2027-yil 1-yanvardan boshlab iqtisodiyotning barcha tarmoqlarida ishga qabul qilishda Milliy malaka ramkasiga mos keluvchi diplom yoki sertifikat talab qilinadi.
Bu mehnat bozorida aniq kompetensiyalarga ega bo‘lgan kadrlar ulushini oshirishga xizmat qiladi. Davlat kasbiy ta’lim muassasalarida ta’lim narxini bozor sharoitiga mos belgilash va tajribali mutaxassislarni shartnoma asosida to‘g‘ridan-to‘g‘ri ishga jalb qilish imkoniyati ham yaratiladi.
Yangi tizimning muhim jihatlaridan biri hududiy tadbirkorlar kengashlarini tashkil etishdir. Ular biznes, davlat va ta’lim sohalari o‘rtasidagi hamkorlikni kuchaytirib, mahalliy ehtiyojga mos kasbiy dasturlarni ishlab chiqishda yordam beradi.
Mutaxassislarning ta’kidlashicha, ushbu islohotlar natijasida kasbiy ta’lim tizimida barqaror boshqaruv, yagona standartlar va mehnat bozori talablariga mos kadrlar tayyorlash tizimi yo‘lga qo‘yiladi. Bu esa aholi bandligini oshirish va mamlakat iqtisodiy rivojlanishini ta’minlashda muhim omil bo‘ladi.
Manba: zamin.uz
