O‘zbekistonda oylik maoshlar 19 foizga oshdi
O‘zbekistonda aholining oylik daromadlari sezilarli darajada oshmoqda. Bu haqda Zamin.uz xabar berdi.
Davlat statistika qo‘mitasining 2025-yil yanvar-sentyabr oylaridagi ma’lumotlariga ko‘ra, respublika bo‘yicha o‘rtacha nominal ish haqi 6 million 166,9 ming so‘mga yetib, o‘tgan yilning mos davriga nisbatan 19,2 foizga o‘sdi. Hududlar kesimida Toshkent shahri yetakchilik qilmoqda.
Bu yerda o‘rtacha maosh 10 million 379,6 ming so‘mni tashkil etib, 2024-yilga nisbatan 18,7 foizga oshgan. Viloyatlar bo‘yicha ham ish haqlari o‘sishi kuzatilmoqda.
Masalan, Samarqandda o‘rtacha ish haqi 4 million 853,3 ming so‘mga yetib, o‘sish sur’ati 24,8 foizni tashkil etdi. Namangan, Sirdaryo, Farg‘ona va Jizzax viloyatlarida ham oylik maoshlar 19 foizdan ortiq ko‘tarildi.
Iqtisodiy faoliyat turlariga qaraganda, eng katta o‘sish ko‘ngilochar va dam olish sohasida qayd etildi. Bu sohada o‘rtacha ish haqi 5 million 114,7 ming so‘mga yetib, 22,8 foizga oshdi.
Ta’lim sohasida ham ish haqi o‘sishi kuzatilib, o‘rtacha 4 million 188,5 ming so‘mga yetdi, bu 19,8 foizlik o‘sishni anglatadi. Transport va logistika yo‘nalishida oylik maosh 9 million 382,1 ming so‘m bo‘lib, 16,7 foizga ko‘paydi.
Axborot va aloqa sohasida esa ish haqi 14 million 985,8 ming so‘mga yetib, 16,6 foizga o‘sdi. Sanoatda o‘rtacha maosh 7 million 301 ming so‘mni tashkil qilib, 16,3 foizga oshdi.
Qurilish sohasida ish haqi 6 million 342,6 ming so‘mga yetib, 9,2 foizga o‘sdi. Savdo sohasida o‘rtacha maosh 6 million 875,6 ming so‘m, yashash va ovqatlanish xizmatlarida esa 5 million 122,8 ming so‘mni tashkil etdi.
Sog‘liqni saqlash va ijtimoiy xizmatlarda ish haqi 3 million 765,4 ming so‘mga yetib, 14,6 foizga oshdi. Bank, sug‘urta va kredit sohalarida esa eng yuqori oylik — 16 million 828,9 ming so‘m qayd etildi, bu 15,6 foizlik o‘sishni bildiradi.
Mutaxassislar fikricha, ish haqlarining bunday o‘sishi mamlakatdagi iqtisodiy barqarorlik, ishlab chiqarish faolligining oshishi va yangi ish o‘rinlarining yaratilayotganidan dalolatdir. Hududlar va sohalar kesimidagi farqlar esa iqtisodiy salohiyat va investitsiya muhitining turlicha rivojlanganligini ko‘rsatadi (manba: Davlat statistika qo‘mitasi).
