O‘zbekistondan 22 ming tonna olma eksport qilindi

O‘zbekistonda olma yetishtirish va eksport qilish salohiyati kundan-kunga ortib bormoqda. Bu haqda Zamin.uz xabar berdi.

Milliy statistika qo‘mitasining ma’lumotlariga ko‘ra, 2025-yilning yanvar-avgust oylarida mamlakat jami 22,6 ming tonna olmalarni 10 ta davlatga eksport qilgan. Eksport qilgan mahsulotlarning umumiy qiymati 11,6 million AQSH dollariga teng bo‘ldi.

Asosiy xaridorlar qatorida Rossiya va Qozog‘iston yetakchilik qilmoqda. Rossiyaga 10 721 tonna, Qozog‘istonga esa 10 098 tonna olma yetkazib berilgan.

Bundan tashqari, Qirg‘izistonga 1 275 tonna, Turkmaniston va Iroqqa esa 300 tonnadan ortiq olma eksport qilingan. Mutaxassislarning fikricha, O‘zbekiston Markaziy Osiyoda olma yetishtirish bo‘yicha yetakchi davlatlardan biriga aylanishi mumkin.

Bu mahsulotlarning tabiiy ta’mi, yuqori sifati va raqobatbardosh narxlari sababli milliy mahsulotlarga tashqi bozorlarda talab oshmoqda. Eksport hajmining ko‘payishi nafaqat dehqonlarning daromadini oshiradi, balki mamlakat qishloq xo‘jaligi sohasining iqtisodiy ahamiyatini yanada mustahkamlaydi.

Ma’lumot manbai: Milliy statistika qo‘mitasi, one.uz.