Maktab rahbarlari va o‘qituvchilarga bonus joriy qilindi
O‘zbekistonda maktab direktorlari, ularning o‘rinbosarlari hamda o‘qituvchilar uchun mehnat samaradorligiga qarab oylik ustama haqlar joriy qilindi. Bu haqda Zamin.uz xabar berdi.
Bu haqda Vazirlar Mahkamasi ma’lum qildi. Yangi tizimga ko‘ra, ta’lim muassasalari rahbarlari va pedagoglar faoliyati KPI, ya’ni asosiy ish ko‘rsatkichlari bo‘yicha baholanadi.
Ushbu ko‘rsatkichlar asosida har oy bonuslar to‘lanadi. Direktorlar uchun 61 dan 70 ballgacha to‘plaganlarga 3 foiz, 71 dan 80 ballgacha 10 foiz, 81 dan 90 ballgacha 15 foiz, 91 dan 100 ballgacha esa 20 foiz ustama haq belgilanadi.
Direktor o‘rinbosarlari uchun bu ko‘rsatkichlar 2,5 foizdan 10 foizgacha bo‘ladi. Bonus olish huquqi maktabda rahbarlik lavozimida kamida to‘qqiz oy ishlaganlarga beriladi.
Baholash mezonlariga o‘quvchilarning bilim darajasi, fan olimpiadalaridagi yutuqlar, ijodiy faollik va tarbiyaviy ishlar samaradorligi kiradi. Bundan tashqari, “Zakovat” to‘garaklari rahbarlariga oylik maoshining 50 foizi miqdorida bir martalik bonus beriladi.
Jismoniy tarbiya o‘qituvchilari esa faoliyat samaradorligiga qarab 20 foizgacha rag‘bat puli oladi. Mutasaddilar ta’kidlashicha, yangi tizim o‘qituvchilar mehnatini adolatli baholash, ularning kasbiy mahoratini oshirish hamda ta’lim sifatini yaxshilashga xizmat qiladi (manba: vazirlar.uz).
