Mirziyoyev va Vuchich Toshkentda hamkorlik bitimlari imzoladi
Toshkent shahrida 28-oktyabr kuni O‘zbekiston Respublikasi Prezidenti Shavkat Mirziyoyev va Serbiya Prezidenti Aleksandr Vuchich o‘rtasida muzokaralar bo‘lib o‘tdi. Bu haqda Zamin.uz xabar berdi.
Uchrashuv yakunida tomonlar o‘zaro hamkorlikni mustahkamlashga qaratilgan Qo‘shma deklaratsiyani imzoladilar. Shuningdek, hukumatlararo va idoralararo bir qator hujjatlar qabul qilindi.
Ularga investitsiyalarni rag‘batlantirish va himoya qilish bo‘yicha bitim, iqtisodiy hamkorlik to‘g‘risidagi bitim, tibbiyot sohasida hamkorlik, turizm, ta’lim, fan va madaniyat sohalaridagi hamkorlik bitimlari kiradi. Bundan tashqari, muhandislik, ilg‘or texnologiyalar, sun’iy intellekt va turdosh sohalarda hamkorlikni rivojlantirish bo‘yicha bitim, diplomatik kadrlar tayyorlash sohasida bayonnoma imzolandi.
Tashqi ishlar vazirliklari o‘rtasida 2026-2027-yillarga mo‘ljallangan hamkorlik dasturi qabul qilindi. Mehnat migratsiyasi, sport va jismoniy tarbiya sohalarida hamkorlik to‘g‘risida memorandum va bayonnoma ham imzolandi.
Shuningdek, Toshkent va Belgrad shaharlari o‘rtasida sheriklik munosabatlarini o‘rnatish bo‘yicha bitim tasdiqlandi. Ushbu hujjatlar ikki davlat o‘rtasidagi do‘stona va samarali hamkorlikni yanada mustahkamlashga xizmat qiladi.
(Manba: zamin.uz)
