O‘zbekistonda radioaktiv chiqindilar xavfsiz boshqariladi
O‘zbekistonda radioaktiv chiqindilar bilan ishlash xavfsizlik qoidalari tasdiqlandi. Bu haqda Zamin.uz xabar berdi.
Ushbu hujjatda atom elektr stansiyalari, ilmiy-tadqiqot reaktorlari va boshqa yadro obyektlarini ishlatish yoki ularni foydalanishdan chiqarishda yuzaga keladigan chiqindilarni boshqarish tartibi belgilangan. Hujjatga muvofiq, radioaktiv chiqindilar bilan ishlashda xodimlarning nurlanish dozalari doimiy ravishda nazorat qilinishi shart.
Chiqindilar faoliyat darajasiga qarab tasniflanishi, radiatsiya tarqalishini oldini olish uchun maxsus himoya to‘siqlari qo‘llanilishi va xodimlar zarur shaxsiy himoya vositalari bilan ta’minlanishi lozim. Radiatsiyaviy nazoratning shakllari obyektning loyiha va foydalanish hujjatlarida aniq ko‘rsatilishi kerak.
Shuningdek, radioaktiv chiqindilar bilan ishlovchi tashkilotlar xavfsizlikni ta’minlash maqsadida maxsus ko‘rsatmalar va qo‘llanmalar ishlab chiqishi talab etiladi. Atom energiyasidan foydalanish jarayonida hosil bo‘ladigan radioaktiv chiqindilar hajmi haqida yillik hisobotlar tayyorlanishi ham majburiydir.
Bu qoidalar yadro obyektlarida xavfsizlikni oshirish va atrof-muhitni himoya qilishga qaratilgan. Manba: zamin.uz
