Kam ta’minlangan 1,1 mln oilaga yordam beriladi
O‘zbekistonda 2025/2026 yillar qish mavsumiga tayyorgarlik doirasida kam ta’minlangan oilalarni qo‘llab-quvvatlash bo‘yicha yirik ijtimoiy dastur amalga oshirilishi belgilandi. Bu haqda Zamin.uz xabar berdi.
Ushbu maqsadda Davlat byudjetidan 1,2 trillion so‘m ajratiladi. Rejaga ko‘ra, mamlakat bo‘ylab 1,1 million oila bir martalik moddiy yordam sifatida 1 million so‘mdan mablag‘ oladi.
Milliy ijtimoiy himoya agentligi ma’lumotiga ko‘ra, bu yordam o‘tgan yilgi ko‘rsatkichdan 2,5 baravar ko‘pdir. O‘tgan yilda 120 ming oilaga 270 ming so‘mdan yordam berilgan edi.
Joriy yilda esa 822 ming oila ijtimoiy reyestrga kiritilgan bo‘lib, yana 290 mingdan oshiq oila "Mahallaning yettiligi" tizimi orqali aniqlangan. Qo‘shimcha ro‘yxatga kiritilgan oilalar quyidagi toifalarga bo‘linadi: nogironligi bo‘lgan shaxs yashaydigan oilalar (76,3 ming), faqat pensiya hisobidan yashayotgan oilalar (69,7 ming), boquvchisi mehnat migratsiyasida bo‘lgan oilalar (34,7 ming), boquvchisini yo‘qotgan oilalar (33,8 ming), og‘ir kasalligi bor shaxs yashaydigan oilalar (23,7 ming), yolg‘iz yashovchi keksa odamlarga tegishli oilalar (7 ming), gaz tarmog‘iga ulanmagan oilalar (2 ming), oila a’zolari soni uchdan oshadiganlar (26,2 ming), vaqtincha ishsizlar (15,1 ming) va yolg‘iz yashovchi shaxslar (2,3 ming).
Dastur doirasida eng ko‘p yordam nogironligi bo‘lgan shaxslar va pensionerlar yashaydigan oilalarga yo‘naltiriladi. Ushbu chora-tadbirlar davlat rahbari tomonidan tasdiqlangan bo‘lib, ular qish mavsumida kam ta’minlangan fuqarolarning moliyaviy yukini yengillashtirish hamda ularning turmush sharoitlarini yaxshilashga qaratilgan.
Manba: One.uz.
