Slovakiya Prezidenti O‘zbekistonga rasmiy tashrif bilan keldi
Slovakiya Respublikasi Prezidenti Peter Pellegrini 29-oktabr kuni kechqurun Samarqand xalqaro aeroportiga yetib keldi. Bu haqda Zamin.uz xabar berdi.
Uning O‘zbekistonga tashrifi Prezident Shavkat Mirziyoyevning taklifiga asosan amalga oshmoqda. Prezidentni aeroportda O‘zbekiston Bosh vaziri Abdulla Aripov boshchiligidagi rasmiy delegatsiya kutib oldi.
Tashrif davomida ikki davlat rahbarlari oliy darajadagi muzokaralar o‘tkazishi rejalashtirilgan. Uchrashuvda Toshkent va Bratislava o‘rtasidagi hamkorlikning bugungi holati muhokama qilinib, uni yanada rivojlantirish yo‘nalishlari belgilab olinadi.
Xususan, tomonlar o‘zaro savdo hajmini oshirish va qo‘shma investitsiya loyihalarini amalga oshirish masalalarini ko‘rib chiqmoqdalar. Shuningdek, Prezident Peter Pellegrinining tashrif dasturida UNESCOning 43-Bosh konferensiyasida faxriy mehmon sifatida ishtirok etishi ham ko‘zda tutilgan.
Ushbu xalqaro anjuman 30-oktabr kuni Samarqandda boshlanib, 40 yil ichida birinchi marta tashkilotning Parijdagi bosh qarorgohidan tashqarida o‘tkazilmoqda. Mazkur konferensiyada 200 dan ortiq davlatlardan yuqori darajadagi delegatsiyalar ishtiroki kutilmoqda.
O‘zbekistonning ushbu forumga mezbonlik qilishi mamlakatning xalqaro miqyosdagi obro‘-e’tibori ortib borayotganidan dalolat beradi. Slovakiya Prezidentining tashrifi esa ikki davlat o‘rtasidagi faol siyosiy muloqotning mantiqiy davomidir.
Eslatib o‘tamiz, 2025-yil iyun oyida O‘zbekiston va Slovakiya strategik hamkorlik munosabatlarini o‘rnatish bo‘yicha Qo‘shma deklaratsiya imzolagan edi. Bu hujjat ikki tomonlama aloqalarni yangi bosqichga olib chiqdi.
