Milliy statistika qo‘mitasi O‘zbekiston aholisining jon boshiga to‘g‘ri keladigan daromadlar bo‘yicha yangilangan ma’lumotlarni e’lon qildi. Bu haqda Zamin.uz xabar berdi.
2025-yilning yanvar–sentyabr oylarida aholining umumiy daromadlari 825,3 trillion so‘mni tashkil etdi. Bu ko‘rsatkich o‘tgan yilning shu davriga nisbatan inflyatsiyani hisobga olganda 8,4 foizga yuqoridir.
Hisobotga ko‘ra, mamlakat bo‘yicha jon boshiga moliyaviy tushumlar o‘rtacha 21,8 million so‘mga teng bo‘ldi. Daromadlarning nominal o‘sish sur’ati 116,1 foizni, real o‘sish esa 106,3 foizni tashkil etgan.
Bu aholining ayrim qatlamlarida moddiy imkoniyatlarning ortayotganini ko‘rsatadi. Hududlar kesimida eng yuqori daromad Toshkent shahrida qayd etildi.
Poytaxt aholisi jon boshiga o‘rtacha 52 million so‘m daromadga ega bo‘ldi va bu ko‘rsatkich bo‘yicha mamlakatda yetakchilik qildi. Ikkinchi o‘rinda Navoiy viloyati (32,1 mln so‘m), uchinchi o‘rinda esa Buxoro viloyati (26 mln so‘m) joylashdi.
Qolgan hududlar bo‘yicha ko‘rsatkichlar quyidagicha: Xorazm viloyati – 22,8 mln so‘m, Toshkent viloyati – 21,9 mln so‘m, Andijon viloyati – 19,4 mln so‘m, Farg‘ona viloyati – 18,5 mln so‘m, Samarqand viloyati – 18,1 mln so‘m, Sirdaryo viloyati – 17,2 mln so‘m, Jizzax viloyati – 17,1 mln so‘m, Qashqadaryo viloyati – 17 mln so‘m, Surxondaryo viloyati – 16,5 mln so‘m, Namangan viloyati – 15,8 mln so‘m, Qoraqalpog‘iston Respublikasi – 14,8 mln so‘m. Qoraqalpog‘iston Respublikasida jon boshiga daromadlar eng past bo‘lib, bu hududdagi ish haqi miqdori va iqtisodiy faollikning cheklangan sohalar bilan bog‘liqligi bilan izohlanmoqda.
Shuningdek, avvalroq mamlakatda 73 ming daromadsiz oila ish bilan ta’minlangani va 600 mingdan ortiq oilaga ijtimoiy yordam ko‘rsatilgani haqida xabar berilgandi. Iqtisodchilarning fikricha, aholining daromadlari o‘sishi kichik biznes, xizmat ko‘rsatish va sanoat sohalarining rivojlanishi hamda davlatning iqtisodiy islohotlari bilan bog‘liq.
Ma’lumot manbasi: One.uz.
