O‘zbekistonda ta’limni rivojlantirish bo‘yicha faoliyat olib borayotgan Respublika ilmiy-metodik markazida rahbariyat o‘zgarishi yuz berdi. Bu haqda Zamin.uz xabar berdi.
Mazkur markazning yangi rahbari etib Yuliya Risukova tayinlandi. U bu lavozimda 2023 yil iyun oyidan beri ishlayotgan Voxid Hamidovni almashtirdi.
Hamidov prezident qaroriga muvofiq lavozimidan ozod etildi. 4-noyabr kuni Prezident Administratsiyasi rahbari o‘rinbosari Xilola Umarova markaz jamoasi bilan uchrashib, yangi rahbarni tanishtirdi.
Shuningdek, davlat rahbari tomonidan belgilangan ustuvor vazifalar haqida ma’lumot berdi. Umarova ta’lim sohasidagi yangi loyihalarni tegishli tashkilotlar bilan hamkorlikda samarali amalga oshirish zarurligini alohida ta’kidladi.
Ma’lumot uchun, ushbu markaz prezident tashabbusi bilan 2023 yil aprel oyida tashkil etilgan. Markazning asosiy vazifalari ta’lim standartlarini ishlab chiqish, o‘quv rejalari va dasturlarini tayyorlash, shuningdek, maktabgacha, umumiy o‘rta va maktabdan tashqari ta’lim tizimi uchun o‘quv-metodik majmualarni nashr etishdan iborat.
Ta’lim islohotlari doirasida O‘zbekistonda maktab direktorligi lavozimiga nomzodlar uchun maxsus menejment kurslari joriy etildi. Ushbu kurslarni muvaffaqiyatli tamomlagan nomzodlarning tayinlanishi Direktorlar kengashi tomonidan tasdiqlanadi.
Bu tashabbus ta’lim muassasalarida boshqaruv malakasini oshirishga qaratilgan.
