AQSh Jekson-Venik tuzatmasini bekor qilishni rejalashtirmoqda
AQSh Senatining Xalqaro munosabatlar qo‘mitasi raisi Jeyms Rish Markaziy Osiyo davlatlari, jumladan, O‘zbekiston uchun Jekson-Venik tuzatmasini bekor qilishni nazarda tutuvchi qonun loyihasini Kongressga taqdim etish niyatida ekanligini ma’lum qildi. Bu haqda Zamin.uz xabar berdi.
Jekson-Venik tuzatmasi o‘z davrida "Sovuq urush"ning ramzlaridan biri bo‘lgan. Mazkur tuzatma 1974 yilda AQSh Savdo qonuni tarkibida qabul qilingan bo‘lib, inson huquqlarini buzgan yoki fuqarolarining chet elga chiqish erkinligini cheklagan davlatlarga nisbatan savdo cheklovlarini joriy etishni nazarda tutgan.
Ushbu chora dastlab Sovet Ittifoqiga qarshi qaratilgan edi. Biroq, SSSR parchalanganidan keyin bu qonun amaliy ahamiyatini yo‘qotgan bo‘lsa-da, hali ham sobiq sovet davlatlarining ayrimlariga nisbatan rasmiy ravishda amal qilib kelmoqda.
Bugungi kunga qadar AQSh prezidenti har yili ushbu tuzatmaning ta’sirini vaqtinchalik to‘xtatib turuvchi hujjatni imzolab kelgan. Bu hujjat O‘zbekiston va boshqa mintaqa davlatlariga AQSh bilan oddiy savdo aloqalarini davom ettirish imkonini yaratgan.
Endilikda, ushbu amaliyotni butunlay bekor qilish kutilmoqda. Bu esa, investorlar uchun xavflarni kamaytirib, biznes muhitini barqaror va oldindan rejalashtirishga qulay sharoit yaratadi.
Mazkur qadam Vashingtonning Markaziy Osiyo davlatlari bilan munosabatlarni mustahkamlash yo‘lidagi yana bir muhim harakati hisoblanadi. Shu bilan birga, bu qaror "sovuq urush" merosini ortda qoldirish uchun yangi imkoniyatni ochadi.
Ma’lumot manbasi: One.uz.
