O‘zbekistonga elektrokar importi 2,5 barobar oshdi
2025 yilning dastlabki uch choragida O‘zbekistonga elektrokar importi sezilarli darajada oshdi. Bu haqda Zamin.uz xabar berdi.
Milliy statistika qo‘mitasi bergan ma’lumotlarga ko‘ra, o‘tgan yilning shu davriga nisbatan import hajmi 2,5 barobar ko‘payib, umumiy hisobda 40,3 ming dona elektromobil mamlakatga olib kelingan. Import qilingan elektrokarlarning umumiy qiymati 473 million AQSh dollarini tashkil etgan bo‘lib, ular dunyoning 16 davlatidan yetkazib berilgan.
Ayniqsa, Xitoy Xalq Respublikasi asosiy yetkazib beruvchi sifatida ajralib turibdi. Mazkur davlatdan 39,8 ming dona elektromobil olib kirilgan.
Shuningdek, Gonkongdan 249 ta, Janubiy Koreyadan 165 ta, Germaniyadan 43 ta va AQShdan 25 ta elektrokar import qilingan. Qolgan 65 dona elektromobil boshqa davlatlardan olib kelingan.
Elektrokar importining bunday o‘sishi mamlakatda yengil avtomobillarga bo‘lgan umumiy talabning pasayishi fonida kuzatilmoqda. Xususan, joriy yilning sentyabr oyida 84,6 ming dona avtomobil sotilgan bo‘lib, bu avgust oyiga nisbatan 6,4 foizga kamdir.
Ma’lumot uchun, birinchi elektrokar 1884 yilda britaniyalik ixtirochi Tomas Parker tomonidan yaratilgan. U buni o‘zi ishlab chiqqan kuchli akkumulyatorlar yordamida amalga oshirgan.
