Tibbiyotdagi muammolar: Prezident tanqid va topshiriqlari
O‘zbekiston Prezidenti Shavkat Mirziyoyev tibbiyot tizimidagi muammolarni ko‘rib chiqib, bu borada muhim masalalarni tahlil qildi. Bu haqda Zamin.uz xabar berdi.
Prezident matbuot xizmatining xabar berishicha, so‘nggi besh yil davomida oshqozon-ichak kasalliklari 1,5 barobarga kamaygani aniqlangan. Biroq Qashqadaryo va Navoiy viloyatlarida bu boradagi ijobiy o‘zgarishlar sezilmagan.
Xususan, Yakkabog‘ tumanida fuqarolarning 33 foizi oshqozon-ichak kasalliklari bilan murojaat qilgan bo‘lsa, G‘uzor tumanida bu ko‘rsatkich 29 foizni, Koson va Mirishkor tumanlarida esa 25 foizni tashkil qilgan. Majlis davomida shifokorlarning, ayniqsa, bolalarga antibiotiklarni nazoratsiz buyurayotgani tanqid qilindi.
Bundan tashqari, qishloq joylarida tibbiyot xodimlarini o‘qitish ishlari yetarli darajada tashkil etilmagani qayd etildi. Shuningdek, aholining buyrak kasalliklari bilan bog‘liq muammolariga ham e’tibor qaratildi.
Qoraqalpog‘iston, Xorazm, Farg‘ona va Andijon viloyatlarida buyrak kasalliklari o‘rtacha ko‘rsatkichdan 40-50 foizga yuqori ekani ma’lum qilindi. Davlat rahbari urologiya va nefrologiya markazlariga joylarda kengroq tushuntirish ishlarini olib borishni va bu sohada muammolarni bartaraf etish bo‘yicha chora-tadbirlarni kuchaytirishni topshirdi.
Manba: Zamin.uz.
