Toshkent viloyatida 10–11-asrlarga oid noyob devoriy suratlar topildi. Bu haqda Zamin.uz xabar berdi.
Ushbu topilma tarix uchun katta ahamiyatga ega bo‘lib, milodiy X–XI asrlarga tegishli qadimiy devoriy suratlar qayta tiklandi. Bu haqda O‘zbekiston Fanlar akademiyasi Tarix instituti xabar berdi.
Ma’lum qilinishicha, bu suratlar qadimgi Qanqa shahri shahristonida joylashgan karvonsaroy xarobalaridan topilgan. Arxeologlar fikricha, ushbu karvonsaroy qadimda shaharning iqtisodiy va madaniy markazlaridan biri bo‘lgan.
Karvonsaroyning janubiy darvozasidan taxminan 60 metr uzoqlikdagi binolar boy me’moriy bezaklarga ega ekanligi aniqlangan. Qazishmalar davomida karvonsaroy xonalaridan birining devorlaridan qulab tushgan surat bo‘laklari topilgan.
Ushbu bo‘laklar 25×30, 15×20 va 30×35 santimetr o‘lchamga ega bo‘lib, binoning ichki qismi o‘z davri uchun yuksak badiiy darajada bezatilganini ko‘rsatadi. Mutaxassislarning fikricha, bu topilma arablar yurishidan so‘ng yo‘qolgan devoriy bezak san’ati 10–11-asrlarda Toshkent vohasida qayta tiklanganini isbotlaydi.
Shuningdek, arxeologik ma’lumotlar Toshkent hududida ham devoriy rassomlik maktabi mavjud bo‘lganini ko‘rsatmoqda. Ilgari shunga o‘xshash bezaklar Samarqand va Axsikent yodgorliklaridan ham topilgan.
Hozirda bu topilmalar Madaniy meros agentligi va Samarqand arxeologiya instituti restavratorlari tomonidan o‘rganilmoqda. Eslatib o‘tamiz, 2023-yilda Qanqa yodgorligida olib borilgan izlanishlar davomida V–VII asrlarga oid ibodatxona va harbiy anjomlar ham aniqlangan edi.
Bu topilmalar qadimiy Qanqani nafaqat savdo yo‘llaridagi muhim nuqta, balki san’at va madaniyat markazi bo‘lganini yana bir bor tasdiqlaydi.
