Markaziy Osiyo yetakchilari Islom sivilizatsiyasi markazida bo‘ldi
Toshkent shahrida Markaziy Osiyo davlatlari rahbarlarining yettinchi Maslahat uchrashuvi doirasida muhim madaniy tadbir amalga oshirildi. Bu haqda Zamin.uz xabar berdi.
Ushbu uchrashuvda mintaqadagi qo‘shni mamlakatlar rahbarlari hamda Ozarbayjon prezidenti O‘zbekiston prezidenti Shavkat Mirziyoyev hamrohligida Islom sivilizatsiyasi markazi faoliyati bilan yaqindan tanishdi. Mehmonlar tarixiy ahamiyatga ega bo‘lgan Qur’oni karim zaliga tashrif buyurib, musulmon dunyosi uchun qadrli bo‘lgan Usmon Mus’hafi bilan tanishish imkoniga ega bo‘lishdi.
Bu nodir qo‘lyozma Islom tarixidagi eng qadimiy muqaddas manbalardan biri sanaladi va Markaziy Osiyo xalqlarining ma’naviy birligini ifoda etuvchi muhim tarixiy merosdir. Tashrif davomida davlat rahbarlari markazning asosiy bo‘limlari, jumladan, “Islomdan avvalgi sivilizatsiyalar”, “Birinchi Renessans”, “Ikkinchi Renessans” va “Yangi O‘zbekiston – yangi Renessans” kabi ekspozitsiyalarni ko‘zdan kechirdi.
Ushbu bo‘limlarda Imom Buxoriy, Imom Termiziy, Abu Mansur Moturidiy, Bahouddin Naqshband kabi buyuk olimlarning ilmiy merosi, shuningdek, somoniylar, qoraxoniylar, xorazmshohlar va temuriylar davriga oid qo‘lyozmalar, tarixiy nashrlar va qadimgi o‘zbek tiliga qilingan tarjimalar keng namoyish etilgan. Ushbu markazga tashrif mintaqa davlatlari rahbarlarining umumiy madaniy va ilmiy merosga bo‘lgan e’tiborini, shuningdek, tarixiy o‘zlikka hurmatini yana bir bor namoyon etdi.
Mazkur tadbir Markaziy Osiyodagi davlatlar o‘rtasidagi madaniy aloqalarni mustahkamlashda muhim ahamiyat kasb etdi. Ma’lumot: zamin.uz.
